بەتەمەنترین پەرلەمانتاری كوردستان پارتییە و سەرۆكایەتی یەكەم دانیشتنی پەرلەمان دەكات
دوای ئەوەی كۆمسیۆنی باڵای سەربەخۆی هەڵبژاردن و راپرسی هەرێمی كوردستان ئەنجامە كۆتاییەكانی هەڵبژاردنی پەرلەمانی كوردستانی راگەیاند، بەتەمەنترین پەرلەمانتار كە لە فراكسیۆنی پارتی دیموكراتی كوردستانە سەرۆكایەتی یەكەم دانیشتنی خولی پێنجەمی پەرلەمانی كوردستان دەكات.
رێڤینگ محەمەد بەتەمەنترین پەرلەمانتاری خولی نوێی پەرلەمانی كوردستانە و لە فراكسیۆنی پارتییە، بەگوێرەی پەیڕەوی ناوخۆی پەرلەمانی كوردستان، دوای سوێندخواردنی یاسایی ناوبراو سەرۆكایەتی یەكەم دانیشتن دەكات.
دوای راگەیاندنی ئەنجامە فەرمییەكانی هەڵبژاردنی پەرلەمانی كوردستان، دەركەوت پارتی دیموكراتی كوردستان بە بردنەوەی 45 كورسی پەرلەمانی سەركەوتنێكی گەورەی بەدەستهێناوه و گەورەترین كوتلەی پەرلەمانی بۆ پێكهێنانی حكوومەتی داهاتووی هەرێمی كوردستانی مسۆگەر كردووە.
