پێكهێنانی حكومه‌ته‌كه‌ی عه‌بدولمه‌هدی و دوو ڕووی لایه‌نه سیاسییه‌كانی عێراق
چاوەڕوان دەكرێت، له دانیشتنه‌كه‌ی ئەمڕۆدا ده‌نگدان له‌سه‌ر به‌شێكی كابینه‌كه‌ی عادل عه‌بدولمه‌هدی بدرێت. رۆژی ۲ی۱۱ی۲۰۱۸ دوا واده‌ی ده‌ستوورییه بۆ ئه‌وه‌ی عادل عه‌بدولمه‌هدی كابینه‌ی نوێی حكوومه‌ت پێشكه‌شی ئه‌نجوومه‌نی نوێنه‌رانی عێراق بكات، بۆ ئه‌وه‌ی متمانه‌ی پێبدرێت.
لای خۆیه‌وه هاوپه‌یمانی سائیرون ئاشكرایكرد”هه‌وڵێك بۆ له‌باربردنی حكوومه‌ته‌كه‌ی عه‌بدولمه‌هدی له‌ناو په‌رله‌مان سه‌ریهه‌ڵداوه و له‌لایه‌ن ژماره‌یه‌ك په‌رله‌مانتاری ئه‌م خوله‌وه سه‌ركردایه‌تی ده‌كرێت، ئه‌مه‌ش دوای ئه‌وه‌ی عه‌بدولمه‌هدی ره‌تی كرده‌وه، پۆستی وه‌زاری له حكوومه‌ته‌كه‌ی به‌و په‌رله‌مانتارانه بدات كه ده‌ستیان به‌و جووڵه‌یه كردووه”
زه‌ینه‌ب سابت، پەرلەمانتاری هاوپه‌یمانی سائیرون ده‌ڵێت:” ژماره‌یه‌ك له‌و په‌رله‌مانتارانه‌ی له‌لایه‌ن عه‌بدولمه‌هدییه‌وه ره‌تكراونه‌ته‌وه، ده‌ستیان داوه‌ته هه‌ڵمه‌تێكی چه‌واشه‌كاری بۆ هاندانی په‌رله‌مانتاران، بۆئه‌وه‌ی ده‌نگ به كابینه‌كه‌ی عه‌بدولمه‌هدی نه‌ده‌ن”.
به گوێره‌ی ڕاپۆرتێكی ڕۆژنامه‌ی عه‌ره‌ب له زاری سه‌رچاوه‌ی سیاسی ئاگادار بڵاویكردووه‌ته‌وه، له چه‌ند رۆژی رابردوودا فشاری زۆر گه‌وره خرابووه سه‌ر عادل عه‌بدولمه‌هدی، ژماره‌یه‌كی زۆری كوتله سیاسییه‌كان فشاریان خستبووه سه‌ری له‌باره‌ی پشكه‌كانیان له حكوومه‌تی نوێدا”.
كوتله سونییه‌كان، پێیان باشه ده‌رفه‌ت به عادل عه‌بدولمه‌هدی بده‌ن وه‌زیره‌كانی كابینه‌كه‌ی ده‌ستنیشان بكات، به‌ڵام له گفتوگۆكانیان گوتوویانه، پاڵپشتی حكوومه‌تێك ناكه‌ن كه نوێنه‌ری ئه‌وانی تێدا نه‌بێت.
نووری مالیكی، سه‌رۆكی هاوپه‌یمانێتی ده‌وڵه‌تی یاسا، ده‌یه‌وێت هه‌ر له پۆستی جێگری سه‌رۆك كۆماری عێراق بمێنێته‌وه و ژماره‌یه‌ك وه‌زاره‌تیش بۆ كوتله‌كه‌ی بێت”
لە ۱۲ی۵ی۲۰۱۸ ھەڵبژاردنی پەرلەمانی عێراق بەڕێوەچوو، بەڵام بەھۆی ناكۆكی لەنێوان لایەنەكان تائێستا نەتوانراوە كابینەی حكوومەتی نوێ پێكبھێندرێت”.
