مەسرور بارزانی و بالیۆزی روسیا لە عێراق كۆبوونەوە
ئێوارەی ئەمڕۆ ماكسیم ماكسیموڤ باڵیۆزی رووسیا لە عێراق و شاندی یاوەری سەردانی ئەنجومەنی ئاسایشی هەرێمی كوردستانیان كرد و لە لایەن, مەسروور بارزانی، راوێژكاری ئەنجوومەنی ئاسایشی هەرێمی كوردستان، پێشوازیان لێكرا پاشان لە كۆبوونەوەیەكدا, پەرەسەندنە سیاسی و سەربازییەكانی ناوچەكە بەگشتی و پێكهێنانی حكوومەتی نوێی هەرێمی كوردستانیان تاووتوێ كرد.
هەر لە و دیدارەدا، هەردوولا باسیان لە چۆنیەتی چارەسەركردنی كێشەكانی نێوان بەغدا و هەولێر و پەیوەندییە مێژووییەكانی نێوان رووسیا و هەرێمی كوردستان كرد.
مەسروور بارزانی لەبارەی پێكهێنانی كابینەی نوێی حكوومەتی عێراق ئاماژەی بەوەدا، پێكهێنانی حكوومەتی نوێی عێراق هەنگاوێكی باش بوو لە بەرەوپێشچوونی پرۆسەی سیاسی عێراق و هیوای خواست، سەرۆك وەزیرانی نوێ لە نزیكترین كاتدا پێكهاتەی كابینەكەی تەواو بكات.
لە بەشێكی دیكەی دیدارەكەدا راوێژكاری ئەنجوومەنی ئاسایشی هەرێمی كوردستان، باسی لە جموجۆڵی تیرۆریستانی داعش، لەناوچە كوردستانییەكانی دەرەوەی ئیدارەی هەرێمی كوردستان كرد.
هەر لەو كۆبوونەوەیەدا هەردوولا جەختیان لە گرنگی و پتەوكردنی پەیوەندییەكانی نێوان هەردوو گەلی كوردستان و رووسیا كردەوە، لەو بارەیەوە باڵیۆزی رووسیا لە عێراق ئاماژەی بەوەدا، سەركردایەتی سیاسی رووسیا بە بایەخەوە دەڕوانێتە بارودۆخی كورد و پێگەی هەرێمی كوردستان لە پەرەسەندنەكانی رۆژهەڵاتی ناوەڕاستدا و رایگەیاند: رووسیا پەیوەندی پتەوی لەگەڵ هەولێر هەیه و كار بۆ پەرەپێدانی زیاتری ئەو پەیوەندییانە لە گشت بوارەكان دەكات.
