گۆڕان پۆستی گوته‌بێژی فه‌رمیی له شۆڕش حاجی وه‌رده‌گرێته‌وه
دۆخی ناوخۆیی گۆڕان گەیشتووەتە ئاستێک، کە نیگەرانى بەشێکى زۆری هەڵسوڕاوانى بزوتنەوەکەی لێکەوتووەتەوە و بە ئاشکرا لە میدیا و تۆڕە کۆمەڵایەتییەکان داوای هەڵوەشاندنەوەى خانەی ڕاپەڕاندن و گۆڕینى بەرپرسانى باڵا و ڕیفۆرمێکى گشتگیر لە ئۆرگان و ناوەندەکانى بزوتنەوەکە دەکەن، بەوپێیەی لەئێستا ناوەندی بڕیاری گۆڕان لە سستبوونى تەواوەتى نزیکبووەتەوە، وەک چاودێرانى دۆخى بزوتنەوەکە ئاماژەى بۆ دەکەن.
جڤاتی نیشتمانیی بزوتنه‌وه‌ی گۆڕان سه‌رقاڵی تاوتوێکردنی وەرگرتنەوەی پۆستی گوتەبێژی فەرمیی گۆڕان لە شۆڕش حاجی و ئه‌گه‌ری هه‌یه عەبدولڕەزاق شەریف، ڕێکخەری ژووری ڕۆژنامەوانیی گۆڕان بكرێته گوته‌بێژی فه‌رمی بزوتنه‌وه‌كه .
شاخەوان ڕەئووف بەگ، ئەندامی جڤاتی نیشتمانی گۆڕان ڕایگەیاند: “لە کۆبوونەوەی جڤاتی نیشتمانی باس لەوە کراوە، گوتەبێژێکی نوێ بۆ گۆڕان دیاری بکرێت، بێگومان بڕیارە لە داھاتوویەکی نزیکدا گوتەبێژی نوێی گۆڕان دیاری بکرێت“.
ەندامی جڤاتی نیشتمانی گۆڕان گوتیشی :” تائێستا ھیچ کەسێک بۆ ئەو پۆستە دیاری نەکراوە و ”نازانین مەرجەکانی وەرگرتنی پۆستی گوتەبێژی بزووتنەوەی گۆڕان چییە؟“.
به پێی زانیارییه‌كانی ” خواكوڕك ” ئه‌گه‌ری هه‌یه عەبدولڕەزاق شەریف، ڕێکخەری ژووری ڕۆژنامەوانی گۆڕان، بكرێته گوته‌بێژی فه‌رمیی بزوتنه‌وه‌ی گۆڕان .
سه‌رچاوه‌یه‌كی ئاگادار له ناو بزوتنه‌وه‌ی گۆڕان بۆ ” خواكوڕك ” ـی پشتڕاست كرده‌وه‌و ڕاگەیاند: “بەپێی پەیڕەو و پڕۆگرامی ناوخۆی گۆڕان، پێشتر دکتۆر شاهۆ سەعید کە ڕێکخەری ژووری ڕۆژنامەوانیی گۆڕان بووە، پۆستی گوتەبێژی وەرگرتووە و ئەمجارەش دەبێ بەپێی پەیڕەوی ناوخۆی گۆڕان، پێویستە ڕێکخەری ژووری ڕۆژنامەوانیی گۆڕان پۆستی گوتەبێژی فەرمی وەربگرێت“.
دۆخی بزوتنه‌وه‌ی گۆڕان ئاڵۆزه به‌تایبه‌ت دوای ئه‌وه‌ی ئاشكرا بوو كه كوڕه‌كانی نه‌وشیروان مسته‌فا مانگانه ٢٥٠هه‌زار دۆلار له باڵی خیانه‌تكاری ١٦ی ئۆكتۆبه‌ر وه‌رده‌گرن ،هەروەها تاپۆرکردنی سەرجەم موڵک و ماڵەکانی گۆڕان بەسەر کوڕەکانی نەوشیروان مستەفا، جگە لە پەیوەندییە تایبەتەکەی کوڕەکانی نەوشیروان مستەفا لەگەڵ گروپی خیانه‌تی ١٦ی ئۆكتۆبه‌ر، لە پێناو پاراستنی بەرژەوەندییە داراییەکانیان لە سلێمانی، کێشەی لەنێو بزووتنەوەی گۆڕاندا درووست کردووە و بەشێک لە بەرپرسانی بزووتنەوەکە بە ئاشکرا نیگەرانی خۆیان ده‌رده‌بڕن .
