عارف ته‌یفور: زه‌ره‌ری زۆرمان له حكومه‌تی بنكه فراوان كردو هه‌موو لایه‌نه‌كان جێیان هێشتین
ئەمڕۆ پێنج شه‌ممه 1ی11ی2018 شاندێكی ئەنجوومەنی سەركردایەتی پارتی دیموكراتی كوردستان لە شاری سلێمانی سەردانی مەڵبەندی 1ی سلێمانی یەكێتی نیشتمانی كوردستانیان كرد .
له میانی كۆنگره‌یه‌كی هاوبه‌شدا عارف تەیفور، سەرۆکی ئەنجوومەنی سەرکردایەتی پارتی لە سلێمانی رایگەیاند: “نامانەوێت جارێكی دیكە حكوومەتی بنكە فراوان لە كوردستان دروست ببێتەوە، چونكە زەرەرمان لێكردووە و ھەموو لایەنەكان جێیان ھێشتین ئێمە و یەكێتیان بە تەنیا ھێشتەوە، بۆیە دەمانەوێت بۆ داھاتوو ھەر لایەنێك لەگەڵمان بێت لە ھەموو دۆخێك تاسەر لەگەڵمان بێت و لە نیوەی رێگا جێمان نەھێڵێ”.
سەرۆکی ئەنجوومەنی سەرکردایەتی پارتی لە سلێمانی گوتیشی: “لیژنەیەكمان بۆ گفتوگۆ دروستكردووە و ئومێد دەكەین لە ماوەیەكی نزیكدا ئەو لیژنەیە لەگەڵ لایەنەكان بكەوێتە گفتوگۆ، پێش ھەموویان بۆچوونی یەكێتی لەسەر پێكھێنانی حكوومەت وەردەگرین”.
عارف تەیفور، سەرۆکی ئەنجوومەنی سەرکردایەتی پارتی لە سلێمانی ده‌شڵێت : “بەپێی ئیستحقاقی ھەڵبژاردن كابینەی داھاتووی حكوومەتی ھەرێم پێكدەھێنرێت و بەمجۆرە ھەر لایەنە و ھەقی خۆی وەردەگرێت ، وەك پارتی ٤۵ كورسیمان ھەیە و تەواوكردنی رێژەی یاسایی لە پەرلەمان بۆ پارتی زەحمەت نییە، بەڵام بۆ پێكھێنانی حكوومەت پێویستمان بە یەكێتییە و لەگەڵ یەكێتی دەكەوینە گفتوگۆ، دواتر لەگەڵ لایەنەكانی دیكەش گفتوگۆدەكەین”.
به پێی ئه‌و ئه‌نجامه‌كانی هه‌ڵبژاردنی ۳۰ـی ئه‌یلول بۆ په‌رله‌مانی كوردستان ” پارتی دیموكراتی كوردستان پله‌ی یه‌كه‌می به به‌ده‌ستهێنانی(٤٥) كورسی به‌ده‌ستهناوه، یه‌كێتی نیشتمانی كوردستانیش پله‌ی دووه‌م به‌به‌ده‌ستهێنانی(٢١) كورسی به‌ده‌ستهێناوه، هه‌ریه‌ك له‌بزوتنه‌وه‌ی گۆڕان و جوڵانه‌وه‌ی نه‌وه‌ی نوێش له‌ڕیزبه‌ندی پله‌ی سێیه‌م و چواره‌مدان.
