نێچیرڤان بارزانی سه‌ركۆنه‌ی هێرشه تیرۆریستییه‌كه‌ی پارێزگای مینای میسر ده‌كات
ئه‌مڕۆ شه‌ممه ۳ی۱۱ی۲۰۱۸ له په‌یامێكدا به‌هۆی هێرشه تیرۆریستییه‌كه‌ی پارێزگای مینای میسر، نێچیرڤان بارزانی سه‌رۆك وه‌زیرانى هه‌رێمى كوردستان وێڕای پرسه و سه‌ره‌خۆشى، سه‌ركۆنه‌ى هێرشه تیرۆرستییه‌كه‌ى رۆژی هه‌ینى پارێزگاى منیاى له میسر كرد،كه به‌هۆیه‌وه ژماره‌یه‌ك هاووڵاتیى مه‌سیحى بوونه قوربانى. دووپاتیكردووه‌ته‌وه كه به‌رده‌وامیى كاره تیرۆرستییه‌كانى داعش، كۆمه‌ڵگه‌ى نێوده‌وڵه‌تى ده‌خاته به‌رده‌م به‌رپرسیارییه‌تییه‌كى گه‌وره‌تر”.
ده‌قى په‌یامه‌كه‌ی سه‌رۆك وه‌زیرانى هه‌رێمى كوردستان
به توندى سه‌ركۆنه‌ى ئه‌و هێرشه تیرۆرستییه ده‌كه‌ین كه دوێنێ هه‌ینى به شێوه‌یه‌كى زۆر دڕندانه كرایه سه‌ر پاسێكى مه‌ده‌نى له پارێزگاى منیا له میسر و تیایدا ژماره‌یه‌ك هاووڵاتیى مه‌سیحى گیانیان له‌ده‌ست دا و بریندار بوون.
پرسه و سه‌ره‌خۆشى له كه‌سوكارى قوربانییان و گه‌ل و حكوومه‌تى میسر ده‌كه‌ین، هاوسۆز و هاوخه‌میانین. خواى گه‌وره سه‌بووریى هه‌موو لایه‌ك بدات و قوربانییان بخاته به‌ر به‌خشنده‌ییى خۆى، هیواى زوو چاكبوونه‌وه بۆ برینداران ده‌خوازین.
وه‌ئه‌ستۆگرتنى ئه‌م تاوانه له‌لایه‌ن تیرۆرستانى داعشه‌وه، ئه‌و ڕاستییه نیشان ده‌دات كه تێكشكاندنى سه‌ربازییانه‌ى تیرۆر له به‌ره‌كانى جه‌نگ و لێسه‌ندنه‌وه‌ى خاك به ته‌نیا به‌س نییه و به‌رده‌وامیى كاره تیرۆرستییه‌كانى داعش، كۆمه‌ڵگه‌ى نێوده‌وڵه‌تى ده‌خاته به‌رپرسیارییه‌تییه‌كى گه‌وره‌ى یه‌كخستنى تواناكان و هه‌ماهه‌نگیى زیاتر بۆ له‌ناوبردن و نه‌هێشتنى تیرۆر.
نێچیرڤان بارزانى
سه‌رۆك وه‌زیرانى هه‌رێمى كوردستان
۳ی۱۱ی۲۰۱۸
