گۆران و یه‌كێتی یه‌كتر تۆمه‌تبار ده‌كه‌ن
دوای ئه‌وه‌ی لە رێگەی راگەیاندنەکانیانەوە یه‌كێتی ھەڵمەتێکی تووندیان بەرامبەر به گۆڕان ده‌ستپێكردووه ده‌نگۆی ئه‌وه بڵاو ده‌كه‌نه‌وه گوایه بەشێك لە کادرو ھەڵسوڕاوانی گۆڕان چوونەتە ناو ریزەکانی یەکێتییەوە، ناکۆکییەکانی گۆڕان و یەکێتی پێدەنێتە قۆناخێکی نوێ و ئەمەش لە میدیاكانی ھەردوولا رەنگی داوەتەوە.
کوێستان محەمەد، ئەندامی جڤاتی گشتی بزووتنەوەی گۆڕان ڕاگەیاند: “ئێستا بارودۆخی ناوخۆی یەكێتی زۆر خراپە، ململانێ و باڵ باڵێن زیاتر تۆخ بووەتەوە. ھەروەھا ئەو بانگەشەیەی یەكێتی پەیوەندی بە دروستكردنی كابینەی نوێی حكوومەتەوە ھەیە، یەكێتی دەیەوێت بە پارتی بڵێت، كە بزووتنەوەی گۆڕان لاوازبووە، ئێمە لایەنێكی بەھێزین و ھێزی دووەمین لە كوردستان، بۆیە دەبێ زۆرترین پلە و پۆست بدرێت بە ئێمە”.
لای خۆیه‌وه نەسروڵڵا سورچی، ئەندامی سەرکردایەتی یەکێتی گوتی :” ھیچ پیلانێكی سیاسیمان دژی ھیچ لایەنێك نییە، ئەو كەسانەی دێنەوە ناو یەكێتی بە ئارەزووی خۆیان دێن و ئەوەی لە یەكێتیش دەڕوات رای خۆیەتی و كەس رێگری لێ ناكات”.
گۆڕان وه‌كو هێزێكی سیاسی له یه‌كێتی جیابویه‌وه‌و ماوه‌ی نۆساڵه دامه‌زراوه ، له هه‌ڵبژاردنه‌كانی ڕابردوو توانی ڕێژه‌یه‌كی زۆر ده‌نگ به ده‌ست بهێنێت و له هه‌لبژاردنی ساڵی ۲۰۱۳ بۆ په‌رله‌مانی كوردستان توانی ۲٤ كورسی به‌ده‌ست بهێنێت و له ۲۰۱۴ بۆ ئه‌نجومه‌نی نوێنه‌رانی عێراق توانی ۹ كورسی به‌ده‌ست بهێنیت ، به‌ڵام له ماوه‌ی چوار ساڵی ڕابردوودا گۆرانكاری گه‌وره كوردستان و ناوچه‌كه‌ی گرته‌وه‌و گۆرانیش زیاتر ده‌نگه‌كانی له سلێمانیدایه و ڕێكخه‌ری گشتی نه‌وشیروان مسته‌فا كۆچی دوای كرد و بزوتنه‌وه‌كه توشی كێشه‌و گرفتی ئیداری و ناوخۆی و جه‌ماوه‌ره‌كه‌ی بێهیوا بوون .
