سەرۆك بارزانی لە شاری نەجەف لەگەڵ سەرۆكی ڕەوتی سەدر كۆبوونەوە
دوای ئەوەی سەرۆك بارزانی سەردانی بەغدای كرد ك تێیدا چاوی بە سەرۆك وەزیران و سەرۆكی پەرلەمان و ژمارەیەك بەرپرسی باڵا كەوت, لە درێژەی سەردانەكە ئەمڕۆ ھەینی 23ـی 11ـی 2018 سەرۆك مەسعود بارزانی گەیشتە شاری نەجەف و بە گەرمی لەلایەن بەڕێز موقتەدا سەدر سەرۆكی ڕەوتی سەدر پێشوازییان لێ كرا.
لە كۆبوونەوەیەكدا كە بەڕێزان مەسروور بارزانی ڕاوێژكاری ئەنجوومەنی ئاساییشی هەرێمی كوردستان و ئازاد بەرواری ئەندامی مەكتەبی سیاسیی پارتی یاوەری سەرۆك بارزانی بوون، سەرەتا سەرۆكی ڕەوتی سەدر خۆشحاڵیی خۆی بە سەردانی سەرۆك بارزانی ڕاگەیاند و بە سەردانێكی گرینگ و مێژوویی وەسفی كرد و ڕایگەیاند كە سەردانەكە بووەتە مایەی خۆشحاڵیی سەرجەم لایەن سیاسییەكانی عێراق و بە سەرەتایەكی گرینگ و ئاراستەیەكی نوێ و ئەرێنی بۆ پڕۆسەی سیاسیی عێراق و ڕێگرتن لە دووبارەبوونەوەی ھەڵەكان و بونیادنانی حكوومەتی نوێی دەزانن.
لە كۆبوونەوەكەدا هەردوولا ئەوەیان دووپات كردەوە كە دەرفەتێكی نوێ لە پەیوەندییەكانی نێوان هەولێر و بەغدا هاتووەتە ئاراوە و پێویستە كار لەسەر بیناكردنی متمانە و چارەسەركردنی كێشەكان و شەراكەتی ڕاستەقینە بكرێت. جەختیشیان لە بەردەوامیی پەیوەندییەكان و قووڵتركردنەوەی متمانە و پاڵپشتیكردنی حكوومەتی تازەی عێراقی كردەوە.
