یه‌كێتی سه‌ركردایه‌تییه‌كه‌ی په‌راوێزده‌خات و په‌یڕه‌وی ناوخۆشی ده‌كاته گاڵته‌جار
ئەمڕۆ سێشەممە ٢٧ی ١١ی ٢٠١٨، کۆبوونەوەی مەکتەبی سیاسیی یەکێتی ئەنجام درا، لاهوور جەنگی ئه‌ندازیاری خیانه‌تی ۱٦ـی ئۆكتۆبه‌ر کە هیچ پۆستێکی فەرمیی لەنێو یەکێتیدا نییە، لە کۆبوونەوەکەدا بەشداری کردووه. هاوکات لە ڕۆژی ٢٨ی ١٠ی ٢٠١٨، لە کۆبوونەوەیەکی مەکتەبی سیاسیی یەکێتیدا لاهوور جەنگی و قوباد تاڵەبانی بەبێ ئەوەی لە سەرکردایەتییەوە بڕیاری بوونیان بە ئەندامی مەکتەبی سیاسی بۆ دەرکرابێت، بەشدارییان لە کۆبوونەوەکاندا کردووە. پێشتریش چەنداینجار پاڤڵ تاڵەبانی لە کۆبوونەوەی مەکتەبی سیاسیی یەکێتی بەشداری کردووە.
به‌شداریكردنی قوباد و پاڤڵ تاڵه‌بانی له‌گه‌ڵ لاهورجه‌نگی نیشانه‌ی په‌راوێزخستن و حیسابنه‌كردنه بۆ ڕۆڵی سه‌ركردایه‌تی یه‌كێتی له‌لایه‌ن مه‌كته‌بی سیاسی حزبه‌كه‌وه ،چونكه به پێی په‌یره‌وی ناوخۆی یه‌كێتی ئه‌ندامانی مه‌كته‌بی سیاسی له‌لایه‌ن سه‌ركردایه‌تییه‌وه هه‌ڵده‌بژێردرێن .
پێشتریش مستەفا چاوڕەش، ئەندامی سەرکردایەتیی یەکێتیی ڕاگەیاندبوو: ”ھەموو جارێک پاڤڵ تاڵەبانی لەبەر ئیش و کارەکانی دایکی (هێرۆ ئیبراهیم ئەحمەد) بەشداری لە کۆبوونەوەکانی مەکتەبی سیاسیدا دەکات، بەڵام ئەمجارەیان چونکە هێرۆ ئیبراهیم ئەحمەدی دایکی لێرە نەبووە، لەگەڵ ئەوەشدا ھەندێک بابەت پەیوەندی بە زانیاری و ئیشی سەربازییەوە ھەیە، بۆیە لاھوور جەنگی لەوێ بووە“.
بەشداری کردنی قوباد و پاڤڵ تاڵه‌بانی و لاهور جه‌نگی ئه‌ندازیاری خیانه‌ته گه‌وره‌كه كه هیچ بڕیارێکی شەرعیی سەرکردایەتیی حزبەکەیان نییە، بۆخۆی گاڵته‌جارییه به په‌یره‌وی ناوخۆی یه‌كێتی ،هاوكات لە کۆبوونەوەکەی ئەمڕۆی مەکتەبی سیاسیی یەکێتیدا، هەریەک لە مەلا بەختیار، سەعدی پیرە و هێرۆ ئیبراهیم ئەحمەد، لە کۆبوونەوەکەدا بەشدارییان نەکردووە.
