به‌چه‌كی قورس ته‌قه له نوسینگه‌ی بەرەنگاربوونەوەی توندوتیژی دژی ژنان لە سلێمانی ده‌كرێت
شەوی رابردوو له‌لایه‌ن چه‌ند چه‌كدارێكه‌وه به چه‌كی قورس لە گەڕەكی تووی مەلیكی شاری سلێمانی تەقە لە نووسینگەی رۆژھەڵاتی بەرەنگاربوونەوەی توندوتیژی دژی ژنان كراوە.
شۆڕش عەلی، بەڕێوەبەری نووسینگەی رۆژھەڵاتی بەرەنگاربوونەوەی توندوتیژی دژی ژنان لە سلێمانی ڕایگه‌یاند: “كاتژمێر ۱۲ شەوی رابردوو ئاگاداركراینەوە كە تەقە لە نووسینگەكەمان كراوە، كاتێك ھاتین زانیمان بە چەكی ئاربیجی و كلاشینكۆف تەقە لە نووسینگەكەمان كراوە”.
بەڕێوەبەری نووسینگەی رۆژھەڵاتی بەرەنگاربوونەوەی توندوتیژی دژی ژنان گوتیشی: “ھەرچەندە زیانی گیانی نەبووە، بەڵام زیانی مادی ھەیە و ئۆتۆمبێلی نووسینگە و كارمەندەكانمان و دراوسێكانی نووسینگە زیانیان پێگەیشتووە”.
ھەر سەبارەت بە رووداوەكە ھیوا كەریم، گوتەبێژی نووسینگەی رۆژھەڵاتی بەرەنگاربوونەوەی توندوتیژی دژی ژنان لە سلێمانی ده‌ڵێت: “پێشتر ھیچ كەس ھەڕەشەی لە ئێمە لێ نەكردووین و رووداوەكە چاوەڕوانكراو نەبوو، بۆیە گومانمان لە ھیچ كەسێك نییە و لە بنكەی پۆلیسی ئازادی سكاڵامان تۆمار كردووە”.
