فازڵ حاجی :به‌شی VIP بە بڕیاری وەزارەتی ناوخۆ کراوەتەوە
بڕیاری کردنەوەی بەشی ڤی ئای پی (VIP) لە بەڕێوەبەرایەتی هاتووچۆی هەولێر، کاردانەوەی زۆری لێکەوتەوە، بە شێکی زۆر لە چالاکڤانان و تەنانەت پەرلەمانتارانیش لەڕێگەی تۆڕە کۆمەڵایەتییەکانەوە نیگەرانی خۆیان لەو بڕیارە دەربڕی.
فازڵ حاجی، گوتەبێژی پۆلیسی هاتووچۆی هەولێر راگەیاند: “ئەو بەشە بە بڕیاری وەزارەتی ناوخۆ کراوەتەوە، بەڕێوەبەرایەتی هاتووچۆی هەولێر لە خۆیەوە نەیکردووەتەوە. لە بنەڕەتدا ناونانەکەی هەڵەبوو، لە ئەسڵدا بەشی خزمەتگوزاری خێرایە، کە لە هەموو شوێنێک و وڵاتانی پێشکەوتووش هەیە”.
گوتەبێژی پۆلیسی هاتووچۆی هەولێر گوتیشی “کاتێک کەسێک دەچێتە فەرمانگەیەکی حکومی و بیەوێت خزمەتگوزاری زیاتری پێشکەشبکرێت، لە بەرامبەردا رسومات بە حکومەت دەدات، ئەوەش بۆ هاووڵاتییەکی ئاسایی نییە، بەڵکو بۆ کۆمپانیاکانە ئەوانەی بە جارێک چەندین مامەڵە دەهێنن، لەبری ئەوەی ملیۆنێک بدەن لەبەرامبەر پێبژاردنی درەنگکەوتنی مامەڵەکانیان بە ۱۰۰ هەزار مامەڵەکانیان راییدەکەن، لە بەرامبەریشدا ئەو قەرەباڵغییەش کەمدەبێتەوە کە لەسەر هاونیشتمانییان هەیە”.
فازل حاجی گوتەبێژی پۆلیسی هاتووچۆی هەولێر دەڵێت “لێکتێنەگەیشتن لە بڕیارەکەی ئێمە وایکرد ئەو کاردانەوەیەوەی لێبکەوێتەوە. بڕیارەکە هەموو وردەکارییەکانی بڵاو نەکراوەتەوە، خانەوادەی شەهید و ئەنفالکراون و خاوەن پێداویستییە تایبەتەکان دەتوانن لە هەمان بەش مامەڵەکانیان راییبکەن بەبێ ئەوەی ئەو رسوماتە بدەن”.
فازڵ حاجی دەشڵێت “هەر دوێنێ لەگەڵ جێبەجێکردنی ئەو بڕیارە، ئێمە هەزار و ۲۳۰ مامەڵەمان راییکردووە، لەنێویاندا ۳۰ مامەڵە لە بەشی VIP راییکراوە، بۆیە بڕیارەکە زۆر باشە، شوێنەکەش دانەخراوە و هیچ کێشەیەکیشی نییە و بەشەکە وەکو خۆی دەمێنێتەوە”.
لای خۆیه‌وه لیوا هێرش ئەحمەد بەڕێوەبەری هاتوچۆی هەولێر گووتی:”كردنەوەی ئەو بەشە بەگوێرەی گرێبەستێكە لەنێوان كۆمپانیایەك كە شوێنیكەی بە كرێ گرتوەتەوە لەگەڵ وەزارەتی ناوخۆی حكومەتی هەرێم، بۆ كردنەوەی بەشی VIPلەبەڕێوەبەرایەتی هاتوچۆی هەولێر”.
لەبارەی وەرگرتنی پارەكەش بەڕێوەبەری هاتوچۆی هەولێر ده‌ڵێت: یاسا لەهەموو دونیا تا خزمەت باشتر و زیاتر بێت خەرجی زیاتر دەبێت، بۆیە وەرگرتنی بڕی ١٠٠ هەزار دینار لەبەرامبەر ئەو خێرای و خزمەتەیە كە بە هاوڵاتیان و شۆفێران دەكرێت لەبەشی ڤی ئای پی “.
رۆژی ٤ی ئه‌م مانگه به‌ڕێوه‌به‌رایه‌تیی هاتووچۆی هه‌ولێر رایگەیاند: له‌مەو‌دوا شێوازێكی نوێی كاركردنیان ده‌بێت بۆ رایكردنی مامه‌ڵه‌ی هاونیشمانییان بەشێوەیەکی خێرا، هه‌ر كه‌سێك مه‌به‌ستی بێت به‌و شێوازه مامه‌ڵه‌كه‌ی به‌زوویی بكرێت، ده‌بێ بڕی ۱۰۰هه‌زار دینار بدات.
