نێچیرڤان بارزانی و وەزیری وزەی ئەمریكا كۆبوونەوە
![](https://xwakurk.com/wp-content/uploads/2018/12/1-41.jpg)
دوای ئەوەی ئەمڕۆ وەزیری وزەی ئەمریكا سەردانی هەرێمی كودستانی كرد, لەگەڵ سەرۆك بارزانی كۆبوویەوە پاشان لەلایەن نێچیرڤان بارزانی سەرۆك وەزیرانی هەرێمی كوردستان پێشوزای لە وەزیری وزەی ویلایەتە یەكگرتووەكانی ئەمەریكا و شاندێكی یاوەری كرا..
بە پێی هەوالێكی ماڵپەڕی سەرۆكایەتی ئەنجومەنی وەزیران, لە دیدارێكەی نێوان نێچیرڤان بارزانی و پێری و شاندی یاوەری چەند تەوەرێك باسكراون و شاندەكە خۆشحاڵیی خۆیان بە سەردانی هەرێمی كوردستان دەربڕی و دووپاتیان كردەوە كە ئەمەریكا بەردەوام دەبێت لە پشتگیریكردنی جێگیربوونی سەقامگیری لە عێراق و هەرێمی كوردستان و دانوستانی هەولێر ـ بەغدا و چارەسەركردنی كێشەكانی نێوان هەردوولا، هەروەها قوربانیدانی هەرێمی كوردستانیان لە شەڕی دژی داعشدا بەرز نرخاند.
لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی كرد و ئاشكرای كرد كە هەرێمی كوردستان وەك پاڵپشتییەكی بەهێز بۆ خەڵك و حكوومەتی هەرێمی كوردستان سەیری ئەو سەردانەیان دەكات وەك چۆن لەگەڵ هاوپەیمانان لە شەڕی داعشدا پاڵپشت و هاوكاری هەرێمی كوردستان بوون و گرنگیی بەردەوامیی ئەو هاوپەیمانی و دۆستایەتییەیشی دووپات كردەوه.
بەڕێزیان سوپاسی ئەمەریكای كرد بۆ لێكنزیككردنەوەی هەولێر و بەغدا و گەیشتن بە هەندێك لێكگەیشتن و ئامادەییی هەرێمی كوردستانی بۆ چارەسەركردنی كێشەكان دەربڕی و هیوای خواست ئەمەریكا ڕۆڵی خۆی لەمبارەیەوە بگێڕێت بەتایبەتی سەبارەت بە هەناردەكردنی نەوتی كەركووك كە هەر لەسەرەتاوە حكوومەتی هەرێمی كوردستان هەموو ئاسانكاریەكی نیشان داوە به شێوەیەك ڕێژەی ئێستای هەناردەكردن بۆ بەرژوەندی و داهاتی گشتیی عێراق بەكار بهێنرێت.
تاوتوێكردنی دۆخی ناوچەكە و پەرەپێدانی زیاتری پەیوەندییەكانی نێوان هەردوولا، لایەنێكی دیكەی كۆبوونەوەكە بوو.