مەسعود حەیدەر: هەموو عێراق سەرۆك بارزانی بە مەرجەعی خۆیان دەزانن
دوای ئەوەی سەرۆك بارزانی سەردانی بەغدای كرد, لە لایەن بەر پرسانی باڵای عێراق پیشوازیەكی گەرمی لێكرا, هەروەها حەلبوسی سەردانی هەرێمی كوردستانی كرد لەگەڵ سەرۆك بارزانی كۆبوویەوە, چاودێرێكی سیاسی لە هەرێمی كوردستان دەڵێت عێراقیەكان سەرۆك بارزانی بە مەرجەعی هەموو عێراق دەزانن.
مەسعود حەیدەر چاودێری سیاسی و پەرلەمانتاری پێشووی پەرلەمانی عێراق سەبارەت بە كۆبوونەوەی نێوان سەرۆك بارزانی و حەلبووسی گوتی: “یەكەم كۆبوونەوەی لەگەڵ سەرۆك بارزانی بۆ ئەوە دەگەڕێتەوە، كە ناوەندی بڕیاری سیاسی كوردی لای سەرۆك بارزانییە و عێراقییەكان ئەو بە مەرجەعی كورد دەزانن و دەیانەوێت بۆ دەستەبەركردنی سەقامگیری سیاسی عێراق، هەماهەنگی لەگەڵیدا بكەن”.
هەروەها مەسغود حەیدەر رایگەیاند : “لە كۆبوونەوەكاندا دۆخی گشتی عێراقیش تاوتوێ كراوە ، هەتا لەو سەردانەشمان كە لەگەڵ سەرۆك بارزانی بۆ بەغدا كردمان، جەختمان لەسەر ئەوە كردەوە، پێویستە سەركردەكانی عێراق ئەزموون لەو هەڵانەی رابردوو وەرگرن، كە لە ئیدارەدانی دەوڵەت كراون و لاپەڕەیەكی نوێ هەڵدەنەوە و بەگوێرەی دەستوور كیشەكان چارەسەر بكەن”.
ئەو چاودێرەی سیاسی گوتیشی: “لە كۆبوونەوەی حەلبووسی لەگەڵ بەرپرسانی هەرێم جەخت لەوە كراوەتەوە، پێویستە كورد و سوننە و شیعە بە هەرسێ پێكهاتەكانەوە پشتیوانی لە كابینەی عادل عەبدولمەهدی بكەن، بۆئەوەی ببێتە زامنی سەقامگیری سیاسی”.
هەروەها گوتیشی: “تێگەیشتنێك هەیە كە بەڕاستی پێویستە پرسی شەراكەتی راستەقینە، هاوسەنگی لە دامەزراوەكانی دەوڵەت و رێزگرتن لە دەستوور ببنە بنەمای بەڕێوەبردنی دەوڵەتی عێراقی، كە بۆ كوردیش پرسی ماددەی 140، بودجە و پرسی پێشمەرگە دەكەونە ئەو چوارچێوەیە”.
مەسعود حەیدەر ڕوونیشیكردەوە كە لەكاتی سەردانەكەیاندا لەگەڵ سەرۆك بارزانی بۆ بەغدا، سەرۆك بارزانی لە سەرجەم كۆبوونەوەكانیدا لەگەڵ بەرپرسانی عێراق بەڕاشكاوانە دووپاتیكردووەتەوە، بەهیچ شێوەیەك دەستبەرداری مافە نیشتیمانی و نەتەوەییەكانی كورد و خواستەكانی گەلەكەمان نابین”.
جەختیشیكردەوە: “سەرۆك بارزانی بە بەرپرسانی عێراقی راگەیاندووە، ئەو خواستەی بۆ سەربەخۆیی هەمان بووە، هەر زیندووە و دەستی لێ هەڵناگرین”.
