سه‌ركرده‌یه‌كی گۆڕان هۆشداریی توند دەدات .. یەکێتی ئەم کارە بەرامبەر کابینەکەی مەسرور بارزانی بکات ئه‌وا…
سەرکردەیەکی بزووتنەوەی گۆڕان چەند داوایەکی ئاراستەی مەسرور بارزانی، کاندیدی پارتی دیموکراتی کوردستان بۆ پۆستی سەرۆکی حکوومەتی داهاتووی هەرێمی کوردستان کرد و جەختیشی کردەوە کە یەکێتی لە درووستکردنی کێشە بۆ کابینەی نوێی حکوومەت سەرکەوتوو نابێت.
شێخ کامیل نووری، ڕێکخەری ڕایەڵەی پێشمەرگە دێرینەکانی بزووتنەوەی گۆڕان ڕایگەیاند، ئەگەر بزووتنەوەکەی بەشداری لە حکوومەتی نوێی هەرێمی کوردستان بکات، ئەوا پێویستە بایەخ بە پاکێجەکەی بدرێت.
هاوکات داوای لە مەسرور بارزانی ده‌كات، هەندێك گۆڕانکاری و شەفافیەت درووست بکات، بار و گوزەرانی هاووڵاتییان باش بکات و مووچەی فەرمانبەران ئاسایی بکاتەوە، سیستەمی پاشەکەوتی مووچە نەهێڵێت.
لەبارەی ئەگەری درووستکردنی کێشە لەلایەن یەکێتییەوە بۆ کابینەی داهاتووی حکوومەتی هەرێمی کوردستان، ئه‌و سه‌ركرده‌یه‌ی گۆڕان ڕایگەیاند: ”ئەگەر کابینەکەی مەسرور بەرزانی ھەوڵی ئەوە بدات ژیانی خەڵکی باش بکات، یان گۆڕانکاری ڕیشەیی بکات، ئەوکاتە بەرچاوی خەڵکی ڕوون دەبێ و خەڵکی خۆی قەبووڵی ناکات، کێشە بۆ ئەو کابینەیە درووست بکرێت، بەڵام یەکێتی سەرکەووتو نابی ئەگەر ھەوڵی ئەوە بدات کێشە بۆ کابینەکەی مەسرور بارزانی درووست بکات“.
