لە پارێزگای سلێمانی داهاتی ناوخۆی ناگەڕێتەوە خەزێنەی حكومەت و كەس نازانێت داهاتوو خەرجیەكانی چەندە
لەگەڵ ئەوەی چەندین ساڵە داهاتی ناوخۆی و خاڵە سنورەیەكانی سڵێمانی نەگەڕاوەتەوە خەزێنەی حكومەت, ئەندامێكی ئەنجومەنی پارێزگای سلێمانی ڕای دەگەیەنێت، داهات و خەرجی پارێزگای سلێمانی دیار نییە و بە نووسراوی فەرمی داوای ئاشكراكردنیان كردووە بۆ ئەوەی لە جێبەجێكردنی پلانی ساڵانە بەرچاوڕوونی بۆ هەموو لایەك هەبێت.
كاسترۆ مەعروف، ئەندامی ئەنجومەنی پارێزگای سلێمانی ڕاگەیاندووە: “لەو خولەی ئەنجومەنی پارێزگای سلێمانی، داهات و خەرجی ساڵانەی پارێزگای سلێمانیمان نەهاتوەتە بەردەست، كە سەرچاوەكانی لەكوێن و لە چی خەرج دەكرێن”.
ئاماژەی بۆ ئەوەش كرد، بەو هۆیەوە نازاندرێت كە ناوچەكان وەك یەك پڕۆژەیان بۆ جێبەجێ دەكرێت یان جیاكاری دەكرێت، هاوكات نازاندرێت كە لە جێبەجێبەجێكردنی پڕۆژەكان كامیان گرنگترە.
ئەو ئەندامەی ئەنجومەنی پارێزگای سلێمانی ڕوونیشیكردەوە، كە بۆ چارەسەركردنی ئەو بابەتە لەڕێگەی سەرۆكایەتی ئەنجومەنەكەوە داوایان لە پارێزگای سلێمانی و ئیدارەكانی گەرمیان و راپەڕین كردووە، بەپێی یاسای ژمارە 3 ی ساڵی 2009 ی ئەنجومەنی پارێزگاكان، لەسەر كۆی داهات و خەرجی ئەمساڵ (2018) زانیارییان پێبدەن.
