لە بەسرە خۆپیشاندان دەستی پێكردەوە
![](https://xwakurk.com/wp-content/uploads/2018/12/1-17.jpg)
دوای ئەوەی لە ماوەی سێ مانگی رابردوو لە پارێزگای بەسەرە بەبەردەوامی خۆپیشاندان لە بەرامبەر كەمی خزمەتگوزاریەكان سازدراوە, ئەمشەو جارێكی دیكە دەیان هاوڵاتیی ناڕازیی بەسرە بەشدارییان لە خۆپیشاندانێكی شەوانەدا كرد و دووبارە داوای باشتركردنی خزمەتگوزاری و دابینیكردنی هەلی كاریان كردەوە.
خۆپیشاندانەكە ئەمشەو دووشەممە 24ی كانونی یەكەمی 2018 لە قەزای هارسە لە باكوری پارێزگای بەسرە سازكرا و دەیان دانیشتوی ئەو قەزایە ناڕەزاییان بەرامبەر خراپیی خزمەتگوزاری دەربڕی و داواشیانكرد هەلی كار بۆ گەنجان دابین بكرێت.
بەپێی میدیا عیراقییەكان خۆپشاندەران كەمێك لە رێگای نێوان هەردوو پارێزگای بەسرە و میسانیان داخستوە و هێزە ئەمنیەكانیش بۆ پاراستنی سەروماڵی هاوڵاتیان بڵاوەیان پێكراوە.
قەزای هارسە چەند هەفتەیەك لەمەوبەر ناحیە بووە و بە بڕیارێكی ئیداری كراوەتە قەزا، دانیشتوانەكەی نزیكەی 200 هەزار كەسە و لە ماوەی چەند ساڵی رابردوودا هاوڵاتیانی ئەو قەزایە، چەندین خۆپیشاندانی ناڕەزاییان بەرامبەر خراپیی ئاستی خزمەتگوزاری سازكردووە.