شەش سەرکردەی بزووتنەوەی ئیسلامی دەستیان لەکار کێشایەوە

بزووتنەوەی ئیسلامی كوردستان بەهۆی قۆڕخكاری دەسەڵاتی حزبەكە لەلایەن كەسی یەكەمی حزب، دووچاری لەتبوون دەبێت و شەش سەركردەی دەست لە كار دەكێشنەوە..

لە ڕاگەیەنراوێكی ئەو شەش سەركردەیەی بزووتنەوەی ئیسلامیدا هاتووە، ئێمە كە پێكهاتووین لە ژمارەیەك لە ئەندامانی مەكتەبی سیاسی و سەركردایەتی بزووتنەوەی ئیسلامی، دوای ددان بەخۆداگرتنێكی درێژخایەن و گرتنەبەری هەموو ڕێیەكی گونجاو بۆ ڕێگری لە بەلاڕێدابردنی بزووتنەوە و كۆتاهێنان بەقۆرخكاری و دەسەڵاتی تاكڕەوی و بەهەدەردانی وزە و توانای كادران و ئەندامانمان، لەپێناوی لە دەستنەدانی زیاتری پێگەی سیاسی و جەماوەری بزووتنەوەی ئیسلامی، دوای ئەوەی چەندان جار ڕێچارەی دروست و حەكیمانەمان خستە بەردەستی كەسی یەكەم و شوورای ناوەندی، بەڵام دەسەڵاتی تاكڕەوانە و قۆرخكاری لەناو حزبدا لەلایەن كەسی یەكەمەوە هەمیشە دەبووە هۆكاری سەرەكی لەباربردنی هەوڵەكانی چاكسازی و ڕێكخستنەوەی بزووتنەوەی ئیسلامی، سەرەنجام بزووتنەوە بەم بارودۆخە لاوازە گەیشت كە هەموومان دەیبینین، لە كۆتایی هەوڵیشماندا لە ۱/۱۱/۲۰۱٨ پڕۆژەیەكی چاكسازیمان دایە ڕابەری گشتی و مەكتەبی سیاسی كە گرنگترین خاڵەكانی بریتی بوون لە:

１-کۆتاییھێنان بە تاکڕەوی و قۆرخکاری لەبڕیار و بەڕێوەبردنی حزبدا.

２-ئاشکراکردنی سەرچاوەکانی داھات و دارایی و چۆنیەتی خەرجی و سپاردنەوەی بە مەکتەبی دارایی.

３-کۆتاییھێنان بەناڕوونی لەسیاسەتی بزووتنەوەدا لەسەر ئاستی ناوخۆ و دەرەوە.

４-کۆتاییھێنان بە کاری بێ سەروبەری و گێڕانەوەی رۆڵ بۆ سەرجەم ئۆرگانەکانی باسک و ئەندامانی مەکتەبی سیاسی و سەرکردایەتی لەچوارچێوەی پەیڕەو و پرۆگرامی ناوخۆی بزووتنەوەی ئیسلامی.

لەو بەیاننامەیەدا ئەوە دووپات کراوەتەوە کە بەهۆی بێ ئاکامیی هەوڵەکانیان، ٦ ئەندامەکەی مەکتەبی سیاسیی بزووتنەوەی ئیسلامی بڕیاری دەست لەکار کێشانەوەیان داوە کە ئەوانیش:

کامیل مەحموود، ئەندامی مەکتەبی سیاسی

محەمەد ئەمین ئاشووری، ئەندامی مەکتەبی سیاسی

موحسین محەمەد ئەمین، ئەندامی مەکتەبی سیاسی

سەرباز خۆشناو، ئەندامی مەکتەبی سیاسی

ئارام کەمال، ئەندامی سەرکردایەتی

عەبدولغەفوور چەمچەماڵی، ئەندامی سەرکردایەتی