(خـواكـورك) دواین زانیارى له‌سه‌ر گرتنى كادره‌كه‌ى پارتى له‌گه‌رمیان بڵاو ده‌كاته‌وه.. لاهوور له پشت كاره‌كه‌وه‌یه
کادیرێکی پارتی دیموکراتی کوردستان کە لەسەر کێشەیەکی بچووك دۆسیەیەکی لەلایەن پۆلیسی گەرمیانەوە هەبووە و بە کەفالەت ئازاد کراوە، لەلایەن لاهوور جەنگی و دژە تیرۆری یەکێتیی نیشتمانیی کوردستانەوە دۆسیەکەی قۆستراوەتەوە و دەستگیریان کردووە.
به‌پێى زانیارییه‌كانى (خـواكـورك) كه له سه‌رچاوه‌یه‌كى پارتى دیموكراتى كوردستان له گه‌رمیان وه‌رى گرتووه، ده‌ركه‌وتووه كه سه‌رخێڵ ئه‌كبه‌ر حاجى رۆسته‌م له‌سه‌ر كێشه‌یه‌ك له‌گه‌ڵ مامى سكاڵاى له‌سه‌ر تۆمار كراوه، به‌ڵام دواتر به كه‌فاله‌ت ئازاد كراوه و كێشه‌كه‌یش به كۆتا هاتووه.
(خـواكورك) زانیویه‌تى، دژه‌تیرۆری یه‌كێتى و لاهوور جه‌نگى ئه‌و كێشه‌یان كردووه‌ته بیانوو بۆ گرتنى سه‌رخێڵ ئه‌كبه‌ر له‌كاتێكدا كێشه‌كه هیچ پێوه‌ندی به ئاسایش و دژه‌تیرۆر نییه، به‌ڵکو له نێوان مام و برازا ده‌مه‌قاڵێ بووه و پۆلیس و دادگا كێشه‌كه‌یان یه‌کلایی کردووه‌ته‌وه و به که‌فاله‌ت ئازاد کراوه، دواتر به بڕیارى لاهوور گیراوه‌ته‌وه.
(خواكورك) زانیویەتی کە عیسمەت ئەرگوشی لە ئاسایشی گشتی و بەرپرسانی پارتی دیموکراتی کوردستان، پەیوەندییان بە وەستا حەسەن، به‌ڕێوه‌به‌ری ئاسایشی سلێمانی و ئاسایشی کەلارەوە کردووە، بەڵام ئەوان گوتوویانە ”لای ئێمە نییە و هیچ پەیوەندی بە ئێمەوە نییە، بەڵکوو دژەتیرۆر گرتوویانە و بردوویانە“. دوای چەندین هەوڵیش بە مەبەستی ڕێگەگرتن لە گەورەبوونی کێشەکە، داوا لە یەکێتی و دەزگاکانی کراوە، بەڵام وەڵامیان ئەوە بووە کە لاهوور جەنگی لە گەشتە و تا دەگەڕێتەوە ناتوانن ئازادی بکەن، دواتریش دەرکەوتووە کە لاهوور جەنگی لە سلێمانییە.
ئەمە لە کاتێکدایە کە جگە لە دەستگیرکردنی سەرخێڵ، میدیاکانی یەکێتی لە سەر زاری ئەکبەر حاجی ڕۆستەمی باوکی سەرخێڵیشەوە لێدوانێکی هەڵبەستراویان بڵاو کردبووەوە کە ئێوارەی ڕۆژی پێنجشەممە ٣ی ١ی ٢٠١٩، کۆچەر ئەکبەر ڕەتی کردەوە باوکی لێدوانی بۆ هیچ دەزگایەکی ڕاگەیاندن دابێت.
