سەرۆكایەتی هەرێمی كوردستان راگەیاندراوێكی لەبارەی سەردانی عەبادی بڵاو كردەوە
![](https://xwakurk.com/wp-content/uploads/2016/11/32432423.jpg)
خواكوڕك
لە راگەیاندراوێ سەرۆكایەتی هەرێمی كوردستان رایگەیاند، ئێوارهی ڕۆژی شهممه ٥ی١١ی٢٠١٦ بەڕێز حەیدەر عەبادی سەرۆك وەزیرانی عێراق بە یاوەریی شاندێكی باڵای سەربازیی سوپای عێراق سەردانی شاری هەولێری كرد و له فرۆکهخانهی نێودهوڵهتی ههولێر لە لایەن بهڕێز مسعود بارزانی سهرۆکی ههرێمی کوردستان و ژمارەیەك بەرپرسی باڵای هەرێم پێشوازیی لێكرا.
لەراگەیاندراوەكە دا هاتووە، له کۆبووونەوەیەكدا هەنگاوەكانی ئۆپهراسیۆنی ئازادکردنهوهی مووسڵ و بارودۆخی مەیدانیی بەرەكانی شەڕ و دوا سەركەوتن و پێشڕەوەییەكانی هێزی پێشمەرگەی كوردستان و هێزەكانی سوپای عێراقی لە میحوەرەكانی باكوور و ڕۆژهەڵات و باشووری مووسڵ تاوتوێ کرا. هەروەها هەردوولا خۆشحاڵیی خۆیان نیشاندا بە ئاستی بەرزی هەماهەنگی و كاری هاوبەشی پێشمەرگە و سوپای عێراق لە چوارچێوەی پلانی ئازادكردنی موسڵ كە بووەتە هۆی بەدیهاتنی دەستكەوت و سەركەوتنی گەورەی سەربازی و تێكشكاندنی خێرای تیرۆریستانی داعش.
لە راگەیاندراوەكەدا هاتووە هەر لەم دانیشتنەدا هەردوولا ستایشی قوربانیدان و قارهمانێتی هێزی پێشمهرگهی کوردستان و هێزه عێراقیهکان و سەرەخۆشیان لە خانەوادەی شەهیدان كرد و هیوای چاكبوونەوەیان بۆ بریندارنی شەڕی دژی تیرۆر خواست.
له تهوهرێکی دیکهی دیدارهکهی سهرۆک بارزانی و سهرۆک وهزیرانی عێراق باس له رهوش و گوزهرانی ئاوارهکانی مووسڵ و ئاوهدانکردنهوه و گهیاندنی خزمهتگوزاری بۆ ناوچه ئازادکراوهکان کرا، لهو کۆبوونهوهیهدا جهخت لهسهر پاراستنی پێکهاته نهتهوهیی و ئاینییەكانی پارێزگای نەینەوا دهورووبهری کرایهوه.
لەكوتای راگەیاندراوەكەی سەرۆكایەتی هەرێم دا هاتووە، جێگەی ئاماژەپێكردنە لهو کۆبوونهوهیهدا که بهڕێزان نێچیرڤان بارزانی سهرۆکی حکومهتی ههرێمی کوردستان و مهسرور بارزانی ڕاوێژکاری ئهنجوومهنی ئاسایشی ههرێمی کوردستان و کهریم شنگالی وەزیری ناوخۆ و وهزیری پێشمهرگه به وهکالهت و فواد حوسێن سەرۆكی دیوانی سەرۆكایەتیی هەرێم ئامادە بوون.