سه‌رۆك وه‌زیرانی هه‌رێمی كوردستان، پێشوازی له ژه‌نه‌راڵ سیر جۆنز لۆریمێر ده‌كات
ئه‌مڕۆ پێنجشه‌ممه 10ی1ی2019، نێچیرڤان بارزانی، سه‌رۆك وه‌زیرانی هه‌رێمی كوردستان، پێشوازی له ژه‌نه‌راڵ سیر جۆنز لۆریمه‌ر گه‌وره ڕاوێژكاری سه‌ربازیی به‌ریتانیا بۆ ڕۆژهه‌ڵاتی ناوه‌ڕاست و نوێنه‌ری تێرازا مه‌ی سه‌رۆك وه‌زیرانی به‌ریتانیا، به یاوه‌ریی به‌ڕێزان جۆن وێلكس باڵیۆزی به‌ریتانیا له عێراق و مارتن وار كونسولی گشتیی به‌ریتانیا له هه‌رێمی كوردستان كرد.
له دیدارەکەدا كاری هاوبه‌شی ئه‌منیی نێوان به‌غدا و هه‌ولێر و هاوپه‌یمانان و پرۆسه‌ی ڕێكخستنه‌وه‌ی وه‌زاره‌تی كاروباری پێشمه‌رگه‌ی هه‌رێمی كوردستان تاوتوێ کران و له‌مباره‌یه‌وه شاندی میوان جه‌ختیان كرده‌وه كه له‌گه‌ڵ هاوپه‌یمانان له‌سه‌ر ڕێكخستنه‌وه و به‌مۆدێرنكردنی وه‌زاره‌تی پێشمه‌رگه به‌رده‌وام ده‌بن.
هەر لەو کۆبوونەوەیەدا، هه‌ردوولا جه‌ختیان له هه‌ماهه‌نگیی نێوان هه‌ولێر و به‌غدا و هاوپه‌یمانان بۆ جێگیركردنی سه‌قامگیری و ئاسایش له‌و ناوچانه‌ی له تیرۆر ڕزگار بوون كرده‌وه. هه‌ماهه‌نگیی نێوان هێزی پێشمه‌رگه و سوپای عێراق كه له ڕابردوودا ئه‌نجامی باشی هه‌بووه دووپات كرایه‌وه و شاندی میوان پشتگیریی خۆیان بۆ ئه‌و هه‌ماهه‌نگییه نیشان دا.
لای خۆیه‌وه سه‌رۆك وه‌زیرانی هه‌رێمی كوردستان سوپاسی ئه‌و سه‌ردانه و هاوكارییه سه‌ربازییه‌كانی به‌ریتانیای بۆ هه‌رێمی كوردستان كرد و ئاماده‌ییی هه‌رێمی كوردستانی بۆ هه‌ر هه‌ماهه‌نگی و هاوكارییه‌كی سه‌ربازی له‌گه‌ڵ به‌غدا و هاوپه‌یمانان بۆ ڕێگریكردن له سه‌رهه‌ڵدانه‌وه‌ی داعش دووپات كرده‌وه.
تاوتوێكردنی دۆخی ناوچه‌كه و دوا پێشوه‌چوونه‌كانی ڕۆژهه‌ڵاتی ناوه‌ڕاست، لایه‌نێكی دیكه‌ی دیداره‌كه بوو.
