وەزارەتی دەرەوەی ئەمریكا پیرۆزبایی بەربژێربوونی بۆ سەرۆكایەتی هەرێم لە نێچیرڤان بارزانی دەكات
![](https://xwakurk.com/wp-content/uploads/2019/01/1-35.jpg)
دوای ئەوەی دوێنێ مایك پۆپمیۆ سەردانی هەرێمی كوردستانی كردو لەگەڵ سەرۆكی حكومەتی هەرێمی كوردستان كۆبوویەوە, وەزارەتی دەرەوەی ئەمریكا رایگەیاند: “مایك پۆمپیۆ پیرۆزبایی لە نێچیرڤان بارزانی، سەرۆكوەزیرانی هەرێمی كوردستان كرد لە بەربژێركردنی بۆ پۆستی سەرۆكی هەرێمی كوردستان”.
لە راگەیێندراوێكدا وەزارەتی دەرەوەی ئەمریكا لەبارەی كۆبوونەوەی مایك پۆمپیۆ، وەزیری دەرەوەی ئەمریكا و نێچیرڤان بارزانی، سەرۆكی حكومەتی هەرێمی كوردستان رایگەیاندووە: “وەزیری دەرەوەی ئەمریكا جەختی لەسەر پاڵپشتی ئەمریكا بۆ دیالۆگی بەردەوامی نێوان حكومەتی هەرێمی كوردستان و حكومەتی ناوەندی بەغدا كردەوە”.
وەزارەتی دەرەوەی ئەمریكا هەروەها رایدەگەیێنێت: “مایك پۆمپیۆ جەختی لەسەر بەهای پەیوەندی ستراتیژیی لەگەڵ عێراق و پەیوەندی دۆستانەی ماوەدرێژیی لەگەڵ حكومەتی هەرێمی كوردستان كردەوە، كە بۆ ئاسایشی دووقۆڵی و سەقامگیری ناوچەكە گرنگە”.
پاشنیوەڕۆی چوارشەممە 9-1-2019 مایك پۆمپیۆ، وەزیری دەرەوەی ئەمریكا گەیشتە هەولێر و لەگەڵ سەرۆك بارزانی، نێچیرڤان بارزانی، سەرۆكوەزیرانی هەرێمی كوردستان و مەسروور بارزانی، راوێژكاری ئەنجوومەنی ئاسایشی هەرێمی كوردستان كۆبووەوە.