هەواڵێکی گرنگ بۆ خەڵکی کوردستان لەبارەی پێکهێنانی کابینەی نوێی حکوومەت .. پارتی زانیاری گرنگی ئاشکرا کرد
چاوەڕوان دەکرێت لەم هەفتەیەدا، گەڕێکی دیکەی سەردانی شاندی پارتی دیموکراتی کوردستان بۆ لای حزبەکان دەست پێ بکاتەوە و ئەندامێکی شاندی پارتیش داوا لە خەڵکی دەکات، گەشبین بن.
بەپێی زانیارییەکانی (خواکورك)، لەم هەفتەیەدا شاندی پارتی دیموکراتی کوردستان سەردانی حزب و لایەنەکانی کوردستان دەکات و گەڕی سێیەمی گفتوگۆکانی تایبەت بە پێکهێنانی کابینەی نۆیەمی حکوومەتی هەرێمی کوردستان بەڕێوە دەچێت.
لەمبارەیەشەوە فرسەت سۆفی، ئەندامی شاندی پارتی، بەبێ ئەوەی وادەی سەردانەکە ئاشکرا بکات، بە کەناڵی (کوردستان ٢٤)ی ڕاگەیاندووە: ئێمە جددین و گفتوگۆیەکی جددی بکرێ و لە کاتێکی زوودا حکوومەت پێک بهێنین.
جەختیشی لەوە کردووەتەوە: بە خەڵکی دەڵێین گەشبین بن، لێکتێگەیشتن هەیە و ئەگەر ناکۆکیش لەسەر چەند خاڵێک هەبێت، ئەوا خەریکین چارەسەریان بۆ بدۆزینەوە، دەشڵێت: لێکتێگەیشتنی هاوبەش هەیە و ئیشەڵا ئەنجامی باش دەبینین.
پێشتر دوو گەڕی گفتوگۆی نێوان لایەنەکان لەبارەی پێکهێنانی حکوومەت بەڕێوە چووە. پارتی کە خاوەنی ٤٥ کورسیی پەرلەمانی کوردستانە، لەگەڵ یەکێتی و گۆڕان گفتوگۆی کردووە، بەڵام بەهۆی ئەوەی یەکێتی دۆسیەکانی هەرێمی کوردستان و بەغدا و کەرکووکی تێکەڵ کردووە و وەک یەک پاکێج سەیریان دەکات، پێکهێنانی کابینەی نوێی حکوومەت دواکەوتووە.
