بریندارێكى ترى شه‌ڕه‌كه‌ى دوێنیی هەولێر گیانى له ده‌ست دا
به‌یانى ئه‌مڕۆ یه‌كێك له برینداره‌كانى شه‌ڕه‌كه‌ى دوێنێى گه‌ڕه‌كى مامزاوه‌ى شارى هه‌ولێر، به‌هۆى سه‌ختى برینه‌كه‌ى گیانى له ده‌ست دا
دوێنێ شه‌ممه له گه‌ڕه‌كی مامزاوای شاری هه‌ولێر باوك و كوڕێك كوژران و سێ كه‌سی تریش بریندار بوون، به‌پێی زانیاریه‌كانی (خـواكورك) ئه‌و كه‌سه‌ى گیانى له ده‌ست داوه پیاوه و سه‌ر به‌و بنه‌ماڵه‌یه‌یه كه دوو كه‌سه‌كه‌ی تریان لێ كوژراوه
هۆگر عه‌زیز گوته‌بێژی پۆلیسی هه‌ولێر به ده‌زگا میدیاییه‌كان ڕایگه‌یاند، شه‌ڕ له نێوان دوو دراوسێ له گه‌ڕه‌كی مامزاوه‌ی هه‌ولێر رووی داوه و به‌هۆیه‌وه كوڕ و باوكێك كوژران و سێ كه‌سی تریش بریندار بوون.
گوته‌بێژی پۆلیسی هه‌ولێر ئاماژه‌ی بۆ ئه‌وه كرد كه لێكۆڵینه‌وه له ڕووداوه‌كه ده‌ستی پێ كردووه و تا ئه‌نجامی لێكۆڵینه‌وه‌كان زانیاری زیاتر بڵاو ناكه‌نه‌وه.
هاوكات به‌پێی ئه‌و زانیارییانه‌ی ده‌ست (خـواكورك) كه‌وتوون، ئه‌و كوڕ و باوكه پێشتر مامه‌ڵه‌ی كڕین و فرۆشتنی كۆتریان كردووه و له ئه‌نجامی شه‌ڕه‌كه‌یشدا سێ كه‌سی تر بریندار بوون كه دووانی تر له‌و خێزانه‌ن كه كوژراویان هه‌یه.
