به‌په‌له .. كه‌مێك له‌مه‌وبه‌ر نێچیرڤان بارزانی هه‌واڵێكی گرنگ و دڵخۆكه‌ری ڕاگه‌یاند
سەرۆک وەزیرانی هەرێمی کوردستان تێپەڕینی ”ڕۆژە سەختەکان“ی ڕاگەیاند و ئاشکرای کرد کە بە گەشبینییەوە سەیری ئایندە دەکەن. جەختیشی لە هەوڵەکانیان بۆ چارەسەرکردنی کێشەکان کردەوە.
کەمێک لەمەوبەر سێ شەممە لە میانی بەشداریکردنی لە کۆڕبەندێکی ئابووریی نێوان بازرگانانی ئێران و هەرێمی کوردستان لە هەولێر، نێچیرڤان بارزانی ئاشکرای کرد: ”خەریکە ئەو قۆناغە سەختە تێدەپەڕێنین، بە دڵنیاییەوە قۆناغێکی نوێ دەست پێ دەکات کە قۆناغێک دەبێت بۆ چارەسەرکردنی ئەو کێشانەی لەم ساڵانەدا ماونەتەوە و نەمانتوانیوە چارەسەری بکەین. من بەڵێنم بە وەزیری دەرەوەی ئێران داوە کە دابنیشین و چارەسەری کێشەکان بکەین جەختیشی لەوە کردەوە کە رۆژە سەختەکان تێپەڕین و زۆر بە خۆشبینییەوە سەیری ئایندە دەکەین.
لەبارەی پەیوەندیی نێوان هەرێمی کوردستان و کۆماری ئیسلامیی ئێران، نێچیرڤان بارزانی ئاماژەی بەوە کرد: پەیوەندیمان لەگەڵ کۆماری ئیسلامیی ئێران پەیوەندییەکی درێژ و مێژوویی و فەرهەنگییە، بۆیە بەردەوام کار لەسەر پەرەپێدانی پەیوەندییەکانمان لەگەڵ ئێران دەکەین و هەوڵ دەدەین لە چوارچێوەی یاسا نێودەوڵەتییەکان پەیوەندییەکە پەرە پێ بدرێت.
نێچیرڤان بارزانی ئەوەشی ئاشکرا کرد کە هەر ئەمڕۆ وەزیری پلاندانانی هەرێمی کوردستان سەردانی بەغدای کردووە، بە مەبەستی چارەسەرکردنی ئەو کێشانەی کە هەن، تاوەکوو چارەسەریان بۆ بدۆزرێتەوە.
ئەوەشی ڕاگەیاند: لە ڕووی سیاسییەوە پشتیوانیی تەواو لە حکوومەتەکەی دکتۆر عادل عەبدولمەهدی دەکەین و هەموو هەوڵێکیش دەدەین ئەو کێشانەی هەرێمی کوردستان لەگەڵ بەغدا هەیەتی، لە چوارچێوەی دەستووری عێراقدا چارەسەریان بۆ بدۆزرێتەوە.
لە کۆتاییشدا سوپاسی باڵیۆزی ئێران لە بەغدای کرد کە ڕۆڵی لە پەرەپێدانی پەیوەندییەکانی نێوان هەولێر و تاران هەبووە و گوتیشی: ”سوپاسی کونسوڵگەریی کۆماری ئیسلامیی ئێران لە هەولێر و سلێمانی دەکەم کە هەردووکیان زۆر دڵسۆزانە هەوڵی جددی دەدەن کە پەیوەندییهکانی هەردوولا بەرەو پێشەوە ببەن“.
