دوایین مۆڵه‌ت بۆ ۳۲ كه‌ناڵی ته‌له‌فیزیۆنی داده‌نرێت
ئەمڕۆ چوارشەممە ۱٦ـی ۱ـی ۲۰۱۹، محه‌مه‌د گه‌ردی، به‌ڕێوه‌به‌ری گشتی رۆشنبیری و چاپ و بڵاوكردنه‌وه له وه‌زاره‌تی رۆشنبیری و لاوانی هه‌رێمی كوردستان، له كۆنگره‌یه‌كی ڕۆژنامه‌وانیدا ڕایگه‌یاند:” ئه‌و كه‌ناڵانه‌ی كه مۆڵه‌تیان نوێ نه‌كردووەته‌وه و روسماتیان نه‌داوە،ده‌بوایه ساڵی ڕابردوو په‌خشه‌كانیان ڕاگیرایه ، بەڵام دوای رەزامەندی ئەنجومەنی وەزیران و وەزارەتی ناوخۆ ماوەیەک مۆڵەتیان پێدرا بۆ نوێکردنەوەی مۆڵەتەکانیان و دانەوەی قەرزەکانیان،هه‌رچه‌نده هەندێک کەناڵ پێوەی پابەندنەبوون”.
به‌ڕێوه‌به‌ری گشتی رۆشنبیری و چاپ و بڵاوكردنه‌وه له وه‌زاره‌تی رۆشنبیری و لاوان، گوتیشی :” له چه‌ند رۆژی رابردودا پێنج كه‌ناڵ مۆڵه‌تیان نوێ كرده‌وه و چوار كه‌ناڵی دیکەش داوایان كردوه تا كۆتایی ئه‌م مانگه كاتیان پێبدرێت، بۆ بڕیاریانداوە هه‌ر كه‌ناڵێك تاوەکو ۳۱-۱-۲۰۱۹ مۆڵه‌ت نوێ نه‌كاته‌وه و قه‌رزه‌كانیان نه‌ده‌نەوە به‌پێی یاسا و رێنماییه‌كان و ئه‌و به‌ڵێنه‌ی واژۆیان كردووه په‌خشیان راده‌گیردرێت”.
هه‌روه‌ها محه‌مه‌د گه‌ردی به‌ڕێوه‌به‌ری گشتی رۆشنبیری و چاپ و بڵاوكردنه‌وه له وه‌زاره‌تی رۆشنبیری و لاوان، ده‌شلێت :” سه‌رجه‌م ئەو کەناڵانەی تا ئێستا مۆڵەتەکانیان نوێ نەکردوەتەوە ۳۲ کەناڵی ئاسمانی و لۆکاڵین و دوایین دەرفەت ۳۱-۱-۲۰۱۹ ده‌بێت “.
لە هەرێمی کوردستان ۱٦۰ رادیۆ و ۱۰٤ كه‌ناڵی ته‌له‌ڤیزیۆنی لۆكاڵی هه‌یه، ئه‌مه جگه له بوونی ۳۹ كه‌ناڵی ئاسمانی، هه‌روه‌ها زیاتر له ۵۰ نووسینگه‌ی كه‌ناڵه بیانییه‌كان له هه‌رێمی كوردستاندا هه‌یه.
