یه‌كێتی له نه‌خشه‌ڕێگایه‌كی نوێدا داوای په‌نجا به‌په‌نجا له پارتی ده‌كات
یه‌كێتی له ڕێگه‌ی ڕێكه‌وتنێكی نوێوه ده‌یه‌وێت ڕێكه‌وتنی ستراتیژی زیندووبكاته‌وه وگەرەنتی چوار ساڵی ئارام دەبەستێتەوە بە نەخشەڕێگایەكەوە كە رادەستی پارتی دیموكراتی كوردستانی كردووە بۆ ئەوەی لەسەری رێكبكەون و بیكەنە بنەمای بەشداری لە حكومەت ، ئەندامێكی سەركردایەتی یەكێتی دەڵێ: “بەبێ ئەو رێككەوتننامەیە ناتوانین گەرەنتی چوار ساڵی ئارام بكەین بۆ حكومەت.
فەرید ئەسەسەرد، ئەندامی سەركردایەتی یەكێتی، نێوەڕۆكی كۆبوونەوەكەی نێوان پارتی و یەكێتی لە سلێمانی ئاشكرا دەكات و ڕایگه‌یاند:” هیچ بەرەو پێشچوونێك بەدی نەهاتووە بۆ ئەوەی بچینە نێو وردەكارییەكانی پێكهێنانی حكومەتەوە، هەموو كۆبوونەوەكان بۆ ئەوە بووە دیدی هاوبەش بدۆزینەوە “ناكۆكی گەورەمان لەسەر بەرنامەی هاوبەشە بۆ ٤ ساڵی داهاتوو كە چۆن هەرێمی كوردستان بەڕێوەببەین و پەیوەندییەكان لەگەڵ بەغدا و وڵاتانی دراوسێ چۆن بن”.
له‌باره‌ی نه‌خشه‌ڕێگای پێشنیاركراوه‌وه ئه‌ندامه‌كه‌ی مه‌كته‌بی سیاسی یه‌كێتی ده‌ڵێت :” دەبێ مامەڵەیەكی هاوبەش لەگەڵ پرس و پەیوەندییە دەرەكییەكان بكرێت، مامەڵەیەكی هاوبەش لەگەڵ بەغدا و ناوچە كوردستانییەكان بكرێ، هەماهەنگی لە پەرلەمانی كوردستان دروستبكرێ، سندوقی داهاتە نەوتییەكان دابمەزرێنرێ، دادگایەكی باڵا بۆ یەكلاكردنەوەی كێشە سیاسی و ئیدارییەكان دروستبكرێ”.
سه‌باره‌ت به پۆستی پارێزگای كه‌ركوك و وه‌زاره‌تی داد ، فه‌رید ئه‌سه‌سه‌رد گووتی :”پارتی بە ئێمەی گوتووە لاری نییە لەسەر ئەوەی بەربژێری یەكێتی پارێزگاری كەركووك وەربگرێتەوە، بەڵام ئەی وەزارەتی داد؟ بەبێ وەرگرتنی وەزارەتی داد، ئێمە ناتوانین لەگەڵ پارتی رێكبكەوین و ببینە هاوپەیمان، چونكە ئەگەر لە نێو ئەنجوومەنی وەزیرانی عێراق نەتوانین كۆدەنگی دروستبكەین، بێگومان لە پەرلەمانیش ناتوانین”.
سرووشتی ئەو رێككەوتنە نوێیەی یەكێتی داوای دەكات، نزیكایەتی زۆری لەگەڵ ئەو پەنجا بەپەنجایە هەیە كە هەر لەسەرەتای هەوڵەكانی پێكهێنانی حكومەتەوە، بەرپرسانی پارتی رەتیانكردەوە.
