بزوتنه‌وه‌ی گۆڕان :بە ھەموو ھێزو توانای خۆمانەوە پشتگیری لە حکوومەتی داھاتوو دەکەین
چالاک موھەندیس، ئەندامی جڤاتی نیشتمانیی گۆڕان، باس له‌خاڵە هاوبەشەکانی نێوان بزووتنەوەکەی و پارتی دیموکراتی کوردستان ده‌كات و ڕاگەیاند: ” بزوتنەوەی گۆڕان بۆ بەشداری کردن لە کابینەی داھاتووی حکوومەتی ھەرێمی کوردستان، ھەموو سەڵاحیاتێکی داوەتە دەستی خانەی ڕاپەڕاند و ئەوانیش لێژنەیان پێکھێناوە بۆ گفتوگۆکردن لەگەڵ برادەرانی پارتی دیموکراتی کوردستان، بێگومان لەو گفتوگۆ و دانیشتنانەدا بەرچاو ڕوونی زیاترمان بۆ پەیدا دەبێ”.
ئه‌ندامه‌كه‌ی جڤاتی نیشتیمانی گۆران ڕاشیگه‌یاند:” خاڵی هاوبەشمان لەگەڵ پارتی، زیاترە لە جیاوازییەکان، بۆیە دانیشتنەکان بەردەوام ده‌بن،بەشداریی گۆران له کابینەی داھاتوودا لە حکوومەتی نوێدا جددی دەبین و بە ھەموو ھێزو توانای خۆمانەوە پشتگیری لە حکوومەتی داھاتوو دەکەین و ھەوڵی ئەوە دەدەین کە ئەوپەڕی توانای خۆمان بەکاربھێنین تاوەکوو کابینەی نۆیەم سەرکەوتوو بێت”.
چالاک موھەندیس، ئەندامی جڤاتی نیشتمانیی گۆڕان گوتیشی:” بۆ کابینەی داهاتوو، گۆڕان بەرنامەیەکی سیاسی پێشکەشی پارتی کردووە و پارتی ھیچ ڕەفزێکیان بەئێمە نەداوە و تێبینیی گەورەیان لەسەر بەرنامەکەی ئێمە نەبووە و بەرنامەکەی ئێمەیان بە پاکێج قەبووڵ بووە، بێگومان ئەوەش نیشانەی ئەوەیە کە پارتی دەیەوێت گۆڕانکاریی گەورە لە گۆڕەپانی سیاسیی کوردستاندا بکرێت”.
هاوکات چالاك موهه‌ندیس هیوای ئەوەی خواست کە مەسروور بارزانی لە سەرۆکایەتیکردنی کابینەی نوێی حکوومەتی هەرێمی کوردستاندا، ”وەک گەنجێک، ھەوڵەکانی بۆ لەناوبردنی گەندەڵی چڕبکاتەوە و کەموکورتییەکان چارەسەر بکات و ژیانێکی خۆش بۆ کۆمەڵانی خەڵکی کوردستان فەراھەم بکات”.
ئەمڕۆ سێشەممە ٢١ی ١ی ٢٠١٩، پاش تەواوبوونی کۆبوونەوەی نێوان شاندی پارتی و گۆڕان لە هەولێر، دانا عەبدولکەریم، ئەندامی شاندەکە بە میدیاکانی راگەیاند، كۆبوونەوەیەكی راشكاوانەیان ئەنجام داوە و تێیدا باس لە میكانیزمەكانی پێكھێنانی حكوومەتی ھەرێمی كوردستان كراوە.
