پسپۆڕان هۆکاری سەرەکی قەڵەویی ئاشکرا دەکەن
پسپۆڕان بڕوایان وایە، جیناتی مرۆڤ رۆلێکی گرنگی هەیە لە لاوازیی و قەڵەویی کەسەکان و بۆ ئەوەش توێژینەوەیەک ئەنجام دراوە.
لە توێژینەوەیەکی زانکۆی کامبریج ئاشکرا کراوە، ئەگەرچی شێوازی ژیان و خواردن کاریگەری لەسەر کێشی مرۆڤ هەیە، بەڵام جیناتی مرۆڤیش رۆڵی سەرەکی هەیە لە قەڵەونەبوونی هەندێک کەس.
توێژینەوەکە ئاشکرایکردووە، 40% بۆ 70% هۆکاری زیادبوونی کێش دەگەڕێتەوە بۆ جینات و هۆکارە بۆ ماوەییەکان.
ئەو پسپۆڕانەی کامبریج توێژینەوەیان لەسەر یەک هەزار و 622 کەسی لاواز و یەک هەزار و 985 کەسی قەڵەو کردووە و جیاناتیان بەراورد کردوون.
بەگوێرەی هەواڵێکی ماڵپەڕی نیوز ویک، سەدەف فارووقی، سەرۆکی توێژینەوەکەی کامبریج ئاشکرایکردووە: “هەندێک کەس لەش و لارێکی رێکیان هەیە، ئەمەش بەشێکی زۆری بۆ ئەوە دەگەڕێتەوە، ئەوان لە رووی بۆ ماوەییەوە چانسێکی زۆر کەمتریان هەیە کە قەڵەو ببن”.
دەشڵێت: “ئەگەر ئەو کەسانەی بەهۆی جیناتیانەوە قەڵەون، دەرمانی تایبەتیان پێبدرێت و کۆنتڕۆڵی ئەو جۆرە جینانە بکەن، ئەوان دەتوانن کێشەی قەڵەویی چارەسەر بکەن”.
زۆر کەس پرسیاری ئەوە دەکات بۆچی هەندێک کەس، سەرەڕای خواردن و خواردنەوەی زۆر، قەڵەو نابن، لە کاتێکدا هەندێکی دیکە، بە خواردنێکی کەم، قەڵەو دەبن و کێشیان زیاد دەکات، پسپۆڕان هۆکاری ئەم حاڵەتە بۆ جینات و هۆکارە بۆ ماوەییەکان دەگەڕێننەوە.
