نێچیرڤان بارزانی سەرەخۆشی له کوردانی ئێزدی و تەواوی گەلی کوردستان ده‌كات
لە پەیامێکدا، کە ئەمڕۆ دووشەممە 28-1-2019 بەبۆنەی کۆچی دوایی میر تەحسین بەگ، مێری ئێزدییانی کوردستان نێچیرڤان بارزانی، سەرۆکی حکوومەتی هەرێمی کوردستان سەرەخۆشی لە کوردانی ئێزدی و تەواوی گەلی کوردستان دەکات.
نێچیرڤان بارزانی ئاماژەی بە مێژوو و خەباتی میر تەحسین بەگ کردووە و رایگەیاندووە، میرتەحسین ”لە بزووتنەوەی کوردایەتی و بە تایبەت لە شۆڕشی ئەیلوولدا، خاوەن پێگە و رۆڵێکی کۆمەڵایەتیی و ئاینیی دیار بوو“.
دەقی پرسەنامەکەی نێچیرڤان بارزانی:
ب ھەلکەفتنا وەغەرا دویماھیێ یا خودێ ژێ ڕازی میر تەحسین بەگ، میرێ ئێزدییا، بەھیداری و سەرساخیێ ل مالبات و کەسوکارێت وی و جڤاتا ڕووحانی و ھەمی خوشک و برایێت مە یێت ئێزدی و گەلێ کوردستانێ بگشتی دکەم. ھەڤپار و ھەڤخەمێن مالباتا وی و تەڤاھییا ئێزدییاینە.
میر تەحسین بەگ کو پتری حەفتێ سالێت چوویی میراتیا ئێزدییا ل کوردستانێ و جیھانێ کر، تەڤی کو دناڤ ئێزدییادا خودان پێگەھـ و ڕۆڵەکێ جڤاکی و ئۆلی یێ دیار بوو، ھەروسا د تەڤگەرا کوردایەتیێ و بتایبەتی ژی د شۆڕەشا ئەیلوولێدا خودانێ ڕۆل و بەشدارییەکا بەرچاڤ بوو، پشتی شۆڕەشێ ژی ژبەر ھەلوێستێن خۆ دەربدەری ولاتان بوو.
میر ته‌حسین بەردەوام دگەل جڤاکا کوردستانێ و عێراقێ و یا دەڤەرێ ژی د پەیوەندیێدا بوویە و ڕێز و پێگەھێ وی یێ جڤاکی نە بتنێ دناڤ ئێزدییادا، بەلکی دناڤ جڤاکا کوردستانێ و یا عێراقێدا ژی دیار و بەرچاڤ بوویە و خودان تۆڕەکا بەرفرەھا پەیوەندییا بوو. بەردەوام ھەول دایە کو گیانێ پێکڤەژیانێ و ھەڤقەبوولکرنێ دناڤ پێکھاتێن کوردستانێ و عێراقێدا خورتر و کوورتر بکەت.
بیرھاتنا وی ب خێر بیت و خودایێ مەزن ب دلۆڤانییا خۆ شا بکەت.
نێچیرڤان بارزانی
سەرۆک وەزیرێ ھەرێما کوردستانێ
٢٨/١/٢٠١٩
