مەسروور بــارزانـی و شاندێكی یەكێتی ئەوروپا دۆخی ناوچهكه تاوتوێ دهكهن
![](https://xwakurk.com/wp-content/uploads/2019/01/masrur-barzane-1.jpg)
ئەمرۆ چوار شهممه ۳۰ی۱ی۲۰۱۹، مەسروور بارزانی راوێژکاری ئەنجوومەنی ئاسایشی هەرێمی کوردستان پێشوازیی لە جین کریستۆف بێلیارد جێگری سکرتێری گشتی یەکێتی ئەوروپا بۆ کاروباری سیاسی و شاندی یاوەری کرد.
لەم دیدارەدا، کە رامۆن بلیکۆ باڵیۆزی یەکێتی ئەوروپا لە عێراق و خاتوو كلاریس پاستۆری، بهرپرسی نووسینگهی یهكێتی ئهوروپا له ههولێر ئامادهیبوو، پەرەسەندن و رەوشی ناوچەکە بەگشتی و پەیوەندیی نێوان یەکێتی ئەوروپا و هەرێمی کوردستان گفتوگۆی لە بارهوه كرا .
مەسرور بارزانی راوێژکاری ئەنجوومەنی ئاسایشی هەرێمی کوردستان پەیوەند بە پەرەسەندنەکانی پەیوەندی نێوان بەغدا و هەولێر ئاماژەی بەدەستپێکردنی قۆناغی نوێی ئەو پەیوەندیانە دا و ئاواتی خواست زەمینەیەکی لەبار برەخسێنرێت بۆ چارەسەری بنەڕەتی پرسە هەڵواسراوەکانی نێوان هەردوولا لە چوارچێوەی دەستوور و لەم هەنگاوەشدا هاوکاری یەکێتی ئەوروپای بە پێویست زانی.
لەلای خۆیەوە جین کریستۆف بێلیارد ئامادەییی خۆیان بۆ پاڵپشتیكردنی هەرێمی كوردستان لە بوارە جیاوازەكاندا و پتەوكردنی زیاتری پەیوەندییەكان نیشان دا بۆ پێداویستییەکانی هەرێمی کوردستان لە بواری چاکسازی و هیوای پێشکەوتنی زیاتری بۆ هەرێمی کوردستان خواست.
تاوتوێکردنی مەترسییەكانی سەرهەڵدانەوەی تیرۆر و میکانیزمی بەرپەچدانەوەی ئەم مەترسیانە و گفتوگۆی لایەنە سیاسییەكان بۆ پێكهێنانی كابینەی نوێی حكوومەتی هەرێمی كوردستان لایەنێكی دیكەی دیدارەكە بوو.