هاوپه‌یمانییه‌تی نێوده‌وڵه‌تی داعش پرسی سه‌رهه‌ڵنه‌دانه‌وه و نه‌گه‌ڕانه‌وه‌ی داعش بۆ عێراق و سوریا تاوتوێ ده‌كات
بڕیاره رۆژی ٦ـی شوباتی ۲۰۱۹، وه‌زیرانی ده‌ره‌وه‌ی وڵاتانی ئه‌ندام له هاوپه‌یمانی نێوده‌وڵه‌تی دژی داعش، له پایته‌ختی ئه‌مه‌ریكا كۆببنه‌وه،هاوپه‌یمانێتی نێوده‌وڵه‌تی دژی داعش له ۷۹ ئه‌ندام پێكهاتووه و گفتوگۆی قووڵ له باره‌ی ئه‌و شكستانه ده‌كرێت كه دووچار رێكخراوی تیرۆریستی داعش بووه و ئه‌نجامی ۴ ساڵ كاركردنه له دژی رێكخراوه‌كه و چالاكییه‌كانی.
له‌و كۆبونه‌وه‌یه‌دا بریاریشه قۆناغی نوێی ئه‌ركی هاوپه‌یمانێتی نێوده‌وڵه‌تی دژی داعش تاوتوێ بكرێت، كه سه‌رنج ده‌خاته سه‌ر ده‌سته‌به‌ركردنی سه‌رهه‌ڵنه‌دانه‌وه و نه‌گه‌ڕانه‌وه‌ی داعش بۆ ناوچه‌كان، ئه‌وه‌ش له رێگه‌ی دابینكردنی سه‌قامگیری ئاسایشی و هاوكاریكردنی ئه‌منییه له عێراق و سووریا.
وه‌زاره‌تی ده‌ره‌وه‌ی ئه‌مه‌ریكا له راگه‌یه‌ندراوێكدا گه‌ره‌نتی به‌رده‌وامی كاركردن له دژی رێكخراوه‌كه ده‌دات و ده‌ڵێت: “ئه‌مه‌ریكا سووره له‌سه‌ر رێگریكردن له گه‌ڕانه‌وه و سه‌رهه‌ڵدانه‌وه‌ی داعش له سووریا و عێراق ته‌نانه‌ت دوای كشانه‌وه‌ی هێزه‌كانیان له سووریا و پابه‌ندن به كاركردن له‌گه‌ڵ هاوپه‌یمانی نێوده‌وڵه‌تی بۆ تێكشكاندنی پاشماوه‌كانی داعش و به‌رگرتن له ئامانجه‌كانی له‌سه‌ر ئاستی نێوده‌وڵه‌تی”.
لای خۆیه‌وه میچ ماكۆنیل سه‌رۆكی كوتله‌ی زۆرینه‌ی كۆمارییه‌كان له ئه‌نجوومه‌نی پیرانی ئه‌مه‌ریكا، هۆشداری له بڕیاری له ناكاوی دۆناڵد تره‌مپ، سه‌رۆكی ئه‌مه‌ریكا ده‌دات بۆ كشانه‌وه‌ی سه‌ربازانییان له سووریا و ئه‌فغانستان و رایده‌گه‌یه‌نێت، تا ئێستاش داعش و قاعیده هه‌ڕه‌شه و مه‌ترسین بۆ سه‌ر ئه‌مه‌ریكا.
دان كۆتس، سه‌رۆكی ده‌زگای هه‌واڵگری نیشتمانی ئه‌مه‌ریكا، له ڕاپۆرتیكی نوێیدا له باره‌ی ئه‌و هه‌ڕه‌شانه‌ی رووبه‌ڕووی ئه‌مه‌ریكا ده‌بنه‌وه ڕایگه‌یاند:” تا ئێستاش داعش هه‌زاران چه‌كداری ماوه، ئه‌وه‌ش وایكردووه ببێته هه‌ڕه‌شه‌یه‌كی به‌هێز له ناوچه‌ی رۆژهه‌ڵاتی ناوه‌ڕاست و شوێنی دیكه.
سه‌رۆكی ده‌زگای هه‌واڵگری نیشتمانی ئه‌مه‌ریكا ده‌ڵێت: “داعش تا ئێستاش هه‌زارانی چه‌كدارانی له عێراق و سووریا ماوه، هاوكات ۸ لقی رێكخراوه‌كه ۱۲ تۆڕی جیاواز و هه‌زاران پشتیوانی رێكخراوه له جیهاندا هه‌ن، سه‌ره‌ڕای ئه‌و زیانه كه‌مه‌رشكێنانه‌ی به‌ر رێكخراوه‌كه كه‌وتوون، به‌ڵام هێشتا مه‌ترسین”.
هاوپه‌یمانی نێوده‌وڵه‌تی دژی داعش، له ۱۳ی حوزه‌یرانی ۲۰۱٤ به سه‌رۆكایه‌تی ئه‌مه‌ریكا راگه‌یه‌ندرا و ئێستاش نزیكه‌ی ۷۹ وڵات تێیدا ئه‌ندامه.
