یه‌كێتی كێشه ناوخۆییه‌كانی په‌ره‌ده‌ستێنێت و ژماره‌یه‌ك سه‌ركرده‌ی باڵا به‌شداری كۆبونه‌وه‌كان ناكه‌ن
كێشه ناوخۆییه‌كانی حیزبی سه‌روباڵ و مل و قاچ ( یه‌كێتی نیشتیمانی ) په‌ره‌ده‌ستێنێت و جگە لە مەلا بەختیار لیپرسراوی ده‌سته‌ی كارگێری مه‌كته‌بی سیاسی ئه‌و حیزبه، هەریەک لە شاڵاو عەلی عەسکەری، حەمەی حەمە سەعید، عیماد ئەحمەد و دلێری سەید مەجید، لەدۆخی ناوخۆی یەکێتی نیگەرانن و بڕیاریانداوە تاوەکوو دۆخی سیاسیی حزبەکە ئاسایی نەبێتەوە و یەکێتی کۆنگرەی چوارەم نەبەستێت، بەشداری لە کۆبوونەوەکانی حزبەکەیان نەکەن.
ئه‌ندامێكی سه‌ركردایه‌تی یه‌كێتی كه نه‌یویست ناوه‌كه‌ی ئاشكرا بكرێت به پێگه‌ی ” خـواكـوڕكـ” ـی ڕاگه‌یاند :” شاڵاو عەلی عەسکەری، لەگەڵ چەند ھەڤاڵێکی سەرکردایەتی و مەکتەبی سیاسی، بەشداریی کۆبوونەوەکانی یەکێتی ناکەن”.
بەھۆی ململانێیە سیاسییەکانی یەکێتییەوە ”خەڵکی شاری سلێمانی ماندوو بوون و شارەکەش خنکێنراوە ، سلێمانی بێ پڕۆژەی خزمەتگوزراییە، ھەرچەندە شارەکە بەو ململانێیە سیاسییانە ڕاھاتووە، بەڵام پێویستە یەکێتی شاره‌كه نه‌كاته قوربانی ململانێ سیاسییه‌كانی خۆیان .
ئه‌مه له كاتێكدایه به‌پێی په‌یره‌وی ناوخۆی یه‌كێتی نیشتیمانی كوردستان ئاساییه به هۆی نه‌خۆشییه‌وه به‌شداری كۆبونه‌وه‌كان نه‌كات و مۆڵه‌ت وه‌ربگرێت ،به‌ڵام ئه‌گه‌ر بۆ ماوه‌ی ساڵێك به‌شداری كۆبونه‌وه‌كان نه‌كات ،ئه‌وا جێگری سکرتێری گشتیی یەکێتی و ئەندامانی دەستەی کارگێڕیی مەکتەبی سیاسی دەتوانن لێپرسینەوە لەگەڵ ئەو ئەندام مەکتەب سیاسییە یان سەرکردایەتییەدا بکەن”.
هاوكات رۆژی پێنجشەممە ڕابردوو، مەلا بەختیار، لێپرسراوی دەستەی کارگێڕیی مەکتەبی سیاسیی یەکێتی بە میدیاکانی ڕاگەیاند: “ئەگەر بڕیاری کۆنگرە بدرێت، دەچمەوە کۆبوونەوەکان و بەشدارییان تێدا دەکەم، بەڵام ئەگەر بڕیاری کۆنگرە نەدرێت، ئەوا، ھەر بە ڕۆڵەی یەکێتی دەمێنمەوە، چی دەکەم؟ لەم ڕۆژانە لە ماڵی خۆمدا چی دەکەم، ھەر ماڵگێڕی خۆم دەبم”.
