محەمەد خورشید: لە چەند ناوچەیەكی كەركووك بازگەی وەهمی داندراون بۆ ڕاووڕووت

لە دوای خیانەتی یەكێتی لە 16ـی ئۆكتۆبەر كەركووك لە لایەن حەشدی شەعبی و سوپای پاسداران داگیركرا, لەو كاتەوە تا ئێستا شارەكە رووبەرووی راوو رووت و هەڵكوتینە سەر ماڵی هاوڵاتیان و دزی بووەتەوە بە جۆرێك زۆرێك لەو كارانە لە لایەن ئەو هێزە ئەمنیانە دەكرێت كە كەركووكیان داگیركردووە, بەرپرسی لقی 3ی پارتی لە كەركووك دەڵی، ڕۆژانە لە باشووری كەركووك و لەسەر رێگا سەرەكیەكان بازگەی وەهمی دروست دەكرێن و پارە لەخەڵك وەردەگیرێت.

محەمەد خورشید، بەرپرسی لقی 3ی پارتی لە كەركووك، بە ماڵپەڕی‌ فەرمیی پارتی دیموكراتی كوردستانی راگەیاندووە: “ڕۆژانە لە باشووری كەركووك و بەتایبەت لەو ڕێگەیەی دەڕوات بەرەو تكریت و، ئەو ڕێگایەی دەڕواتەوە بەرەو داقووق كۆمەڵێك بازگەی وەهمی دروست كراون، جلوبەرگی سەربازییان لەبەرە و خەریكی ڕاووڕووتن و پارە لە شۆفێران وەردەگرن.”

دەربارەی ئەوەی كە ئەم چەكدارانە كێن، بەرپەرسیەكەی پارتی رایگەیاندووە: “باشووری كەركووك ناوچەیەكی كراوەیە بۆ هەموو جۆرە چەكدارێك، ناكرێ دەستنیشان بكرێت كە ئەمانە كێن ڕاووڕووت دەكەن. چەندین چەكداری جۆراوجۆر و میلیشیاكان و پۆلیسی فیدراڵی و سوپا و دژەتیرۆری عێراق و چەندان جۆری تر لە ناوخۆ و دەوروبەری كەركووكن. جیا لەوانیش، داعش لە هەندێك ناوچە هەن. بۆیە ناكرێ دەستنیشان بكرێت كە ئەو چەكدارانە كێن. بەڵام ئەوە ڕوونە كە دەسەڵاتدارانی ئەمنیی ئەو سنوورە لە ئاست ئەو گرووپانەدا بێدەنگن.”

بەرپرسی لقی 3ی پارتی لە كەركووك ئاماژەیشی دا: “بە هۆی بێسەروبەریی هێزەكانی كەركووكەوە بۆشاییەكی ئەمنیی زۆر دروست بووە. مەسەلەی كەركووك تایبەتە و بە پێی دەستوور ناوچەیەكی ناكۆكیلەسەرە و پێویستە بە هەماهەنگیی هەرێم و عێراق بەڕێوە ببرێت.”