سەرۆك وەزیرانی ئیتالیا گەیشتە هەولێر لە لایەن نێچیرڤان بارزانی پیشوزای لێكرا
![](https://xwakurk.com/wp-content/uploads/2019/02/1-9.jpg)
دوای ئەوەی سەرۆكوەزیرانی ئیتاڵیا سەردانی بەغدای كرد لە گەڵ بەرپرسانی ئەو وڵاتە كۆبوویەوە ئێوارەی ئەمڕۆ جۆزیپی كۆنتی، سەرۆكوەزیرانی ئیتاڵیا گەیشتە هەولێر و لەلایەن نێچیرڤان بارزانی، سەرۆكوەزیرانی هەرێمی كوردستانەوە پێشوازی لێكرا ، بڕیارە لەسەردانەكەیدا لەگەڵ بەرپرسانی باڵای هەرێمی كوردستان كۆببێتەوە.
جۆزیپی كۆنتی سەرۆكوەزیرانی ئیتاڵیا لە 8ی ئابی 1964 لە ڤۆلتورا ئەپولا لەدایكبووە. لەڕووی سیاسییەوە كەسێكی سەربەخۆیە و كۆلێژی یاسای لە زانكۆی لاسپینێزا لە رۆما خوێندووە. لە چەند زانكۆیەك وانەی گوتووەتەوە و 1ی حوزەیرانی 2018 بووەتە سەرۆكوەزیرانی ئیتاڵیا.
ئیتاڵیا، یەكێكە لەو وڵاتانەی یەكێتی ئەوروپا كە خاوەن ئابوورییەكی گەورەیە و هەروەها ئەندامێكی كارای هاوپەیمانی نێودەوڵەتییە دژ بە داعش، پەیوەندییەكی بەهێز و نزیكیشی لەگەڵ هەرێمی كوردستان هەیە.
حكومەتی ئیتاڵیا بەفەرمی لە كانوونی یەكەمی 2015 كۆنسولی گشتی خۆی لە هەولێر كردووەتەوەو هەروەها لە شەڕی دژ بە داعش پشتیوانی هێزەكانی پێشمەرگەبووە و لە ماوەی شەڕی داعش چالاكانە هاوكاری هێزەكانی پێشمەرگەی كردووە.
نزیكەی 200 راوێژكاری سەربازی ئیتاڵیا لە هەرێمی كوردستان هەن و لەماوەی رابردوودا مەشق و راهێنانی سەربازیان بە هێزەكانی پێشمەرگە كردووە و هەروەها 11 پێشمەرگەی برینداریش لە ئیتاڵیا چارەسەری پزیشكیان وەرگرتووە.
چەندینجار و لە چەندین وێستگەدا بەرپرسانی باڵای ئیتاڵیا سەردانی هەرێمی كوردستانیان كردووە لە نیویاندا ماتیۆ رێزنی، سەرۆكوەزیرانی پێشووی ئیتاڵیا كە لە 20ی ئابی 2018 بە یاوەری شاندێكی باڵا گەیشتە هەولێر و لەگەڵ هەریەكە لە سەرۆكی هەرێمی كوردستان و سەرۆكوەزیرانی هەرێمی كوردستان كۆبووەوە.
هاوكات بەدەر لە هاتنی سەرۆكوەزیران، چەند جارێكی دیكە وەزیرانی بەرگری و دەرەوەی ئیتاڵیا لەگەرمەی شەڕی داعش هاتوونەتە هەرێمی كوردستان و رۆڵی هێزی پێشمەرگەشیان لە شەڕی دژ بە داعش بەرزنرخاندووە.
حكومەتی هەرێمی كوردستان، نوێنەرایەتی لە رۆمای پایتەختی ئیتاڵیا هەیە و هاوكات پەیوەندییەكانی نێوان هەولێر و بەغدا پەیوەندی تازە نین، بەڵكو مێژووی ئەو پەیوەندییانە بەشێوەیەكی فەرمی بۆ دوای 2003 دەگەڕێنەوە بەتایبەتیش دوای ئەوەی سەرۆك مەسعود بارزانی، لە ساڵی 2005 سەردانی رۆمای كرد و لەگەڵ سیلڤیۆ بەرلسكۆنی، سەرۆكوەزیرانی ئەو كاتەی ئیتاڵیا كۆبووەوە.
هەولێر و رۆما پەیوەندییەكانیان بەبەردەوام لە بەهێزبووندابووە، هەردوو پایتەخت لە تەممووزی 2017 رێككەوتنێكی ژینگەییان واژۆكرد، لەو رێككەوتنەدا ئیتاڵیا بەڵێنی هاوكاریكردنی حكومەتی هەرێمی كوردستانیدا لە هاوكاریكردنی بۆ رووبەڕووبوونەوەی گۆڕانی كەشوهەوا.