سلێمانی كه‌سانی ده‌ستڕۆیشتووی ناو یه‌كێتی زیاتر له ۵۰۰ پارچە زەوی شاره‌وانی داگیرده‌كه‌ن و ده‌یفرۆشنه‌وه
ژمارەیەك ئەندامی ئەنجوومەنی پارێزگای سلێمانی باس له داگیركردنی زه‌وییه‌كانی شاره‌وانی سلێمانی ده‌كه‌ن كه به زه‌بری چه‌ك له‌لایه‌ن كه‌سانی ده‌ستڕۆیشتووه‌وه داگیریان كردووه و دواتر مامه‌ڵه‌ی كرین و فرۆشتنی پێوه ده‌كه‌ن .
رێبوار ئەحمەد، ئەندامی ئەنجوومەنی پارێزگای سلێمانی لە كۆنگرەیەكی رۆژنامەوانیدا رایگەیاند: “داوا لە داواكاری گشتی و دامودەزگا پەیوەندیدارەكان و ھێزە ئەمنییەكانی سلێمانی دەكەین، بێنە سەرخەت، ناكرێ چەند ھاووڵاتییەك بە چەكەوە بوەستن و زەوییەكانی شارەوانی داگیر بكەن و بیفرۆشن، بێ ئەوەی كەس لێیان بپرسێتەوە”.
ئەندامه‌كه‌ی ئەنجوومەنی پارێزگای سلێمانی ،گوتیشی: “زیاتر ۵۰۰ پارچە زەوی لە ناوچەی كانی شینكە لە نزیك شوقەكانی مامۆستایان لە سلێمانی بەمشێوەیە فرۆشراون، ھەروەھا لە چەند شوێنێكی دیكەی سلێمانی بە ھەمانشێوەیە زەوی شارەوانی دەفرۆشرێت”.
