كۆسرەت رەسوڵ: داوایەك لە فراكسیۆنی یەكێتی دەكات لە پەرلەمانی كوردستان
لەگەڵ ئەوەی فراكسیۆنی یەكێتی لە هەڵبژاردنی دەستەی سەرۆكایەتی پەرلەمانی كوردستان لە 18ـی شوبات تەلاری پەرلەمانیان جێ‌هێشت, كۆسرەت ڕەسووڵ عەلی، جێگری یەكەمی سكرتێری گشتیی یەكێتیی نیشتمانیی كوردستان، لەگەڵ ئەندامانی فراكسیۆنی یەكێتی كۆبووەوە داوایەكی لە ئەندامانی فراكسیۆنی حزبەكەی كرد.
میدیای فەرمیی یەكێتی بڵاوی كردەوە كە لەو كۆبوونەوەیەدا كۆسرەت ڕەسووڵ بەرنامە و دیدگای یەكێتی بۆ پەرلەمانتارانی حزبەكە ڕوون كردووەتەوە و داوای لێكردوون ”یەكڕیز و یەكدەنگ بن“.
ئەمە لە كاتێكدایە كە پێش هەڵبژاردنی دەستەی سەرۆكایەتیی پەرلەمانی كوردستان لە ١٨ی شوباتی ٢٠١٩، هەریەك لە ڕێواز فایەق و بێگەرد تاڵەبانی، لەسەر پۆستی سەرۆكی پەرلەمان كێبڕكێیان دەكرد، بەڵام دواتر نەتواندرا هیچ یەكێكیان یەكلا بكرێتەوە و یەكێتی بەشداری لە دانیشتنەكەی پەرلەمان نەكرد، بۆیە ڤالا فەرید لە فراكسیۆنی پارتی، پۆستی سەرۆكی پەرلەمانی كوردستانی وەرگرت.
پێشتریش ڕێواز فایەق ڕایگەیاند بوو ، یەكلا نەبوونەوەی پۆستەكە لە نێوان ئەو و بێگەرد تاڵەبانی، پەیوەندی بە كێشەوە نەبووە. جەختیشی كردەوە: ”ئێمە دامەزراوەی فەرمیمان بۆ بڕیاردان ھەیە، لەسەر پشكەكانی یەكێتی لە حكوومەتی ئایندەدا، بۆیە ھەر بڕیارێك ھی سەركردایەتیی یەكێتی بێت، من پێیەوە پابەند دەبم، چونكە دەزانم بڕیارێك نادات لەبەرژەوەندیی خەڵكیدا نەبێت“.
