مه‌سروور بارزانى له میونشن كوردستانی برده قۆناغێكی گه‌شه‌سه‌ندووتر
به‌شدارى مه‌سروور بارزانى له كۆنگره‌ى ئاسایشى میونشن و كۆبوونه‌وه‌ى له‌گه‌ڵ سه‌رۆك و به‌رپرسانى باڵاى وڵاتانى دنیا، كاردانه‌وه‌ى لێ كه‌وته‌وه و به‌شێك له سیاسه‌توانان پێیان وایه، ئێسته پێوه‌ندییه‌كانى كوردستان له ئاستى دنیا قۆناغێكى باشترى بڕیوه.
ڕۆژى هه‌ینى ڕابردوو كۆنگره‌ى ئاسایشى میونشن ده‌ستى به‌كاره‌كانى كرد، مه‌سروور بارزانى ڕاوێژكارى ئه‌نجوومه‌نى ئاسایشى هه‌رێمى كوردستان به‌شدارى له كۆنگره‌كه‌دا كرد و كۆبوونه‌وه‌ی له‌گه‌ڵ به‌رپرسانى باڵاى وڵاتان و وه‌زیرانى به‌رگرى ئه‌نجام دا.
د. مه‌حموود عوسمان سیاسه‌توانی ناسراوی كوردستان ئه‌وه ده‌خاته ڕوو كه ئێسته پێوه‌ندییه‌كانى كوردستان له ئاستى دنیا زۆر چووه‌ته پێشه‌وه و وڵاتان پشتگیرى به‌رده‌وامى هه‌رێمى كوردستان ده‌كه‌ن به‌تایبه‌ت كه ده‌بینن له ڕابردوو شه‌ڕى چه‌كدارى ڕێكخراوه‌كانى تیرۆریستى كردووه.
ڕوونیشى كرده‌وه كه وڵاتان ده‌یانه‌وێ هاوكارى كورد بكه‌ن و ستراتیجیشیان له‌وباره‌یه‌وه ڕوونه. د. مه‌حموود بۆ “وشه” ئاماژه‌ى دا “به‌شدارى مه‌سروور بارزانى ڕاوێژكارى ئه‌نجوومه‌نى ئاسایشى هه‌رێمى كوردستان له كۆنگره‌ى میونشن پێوه‌ندییه‌كانى زیاتر به‌هێز كرد و بردییه قۆناغێكى تره‌وه”.
وه‌ك دووپاتى كرده‌وه كه “ئه‌و كۆنگرانه ده‌رفه‌تێكى باشن بۆ كورد تا له وڵاتان نزیك ببێته‌وه”.
زۆربه‌ى ئه‌و سه‌رۆك وڵات و به‌رپرسانه‌ى له میونشن بوون و مه‌سروور بارزانى له‌گه‌ڵیان كۆ بووه‌ته‌وه، دووپاتیان له‌وه كرده‌وه كه هاوكارى به‌رده‌وامى هه‌رێمى كوردستان ده‌بن و وه‌ك ڕاوێژكارى ئه‌نجوومه‌نى ئاسایشى هه‌رێمى كوردستان پێشتر له لێدوانێكى ڕۆژنامه‌وانیدا ڕاى گه‌یاند، هه‌وڵى داوه له‌گه‌ڵ به‌رپرسانی باڵای ئه‌و وڵاتانه هاوكارى بۆ هه‌رێمى كوردستان كۆ بكاته‌وه و پێوه‌ندییه‌كان زیاتر گه‌شه بكه‌ن.
عه‌بدولحه‌كیم خه‌سره‌و مامۆستاى زانكۆ، ئاماژه به‌وه ده‌كات كه كوردستان بووه‌ته ناوه‌ندى بڕیاردان بۆ دژایه‌تى تیرۆر و له داهاتوویش هیچ بڕیارێك به‌بێ كوردستان نادرێ. ڕۆڵى مه‌سروور بارزانیشى له كۆنگره‌ى ئاسایشى میونشن “به‌رز” نرخاند.
خه‌سره‌و زیاتر گوتی كورد له ساڵى 2014ـه‌وه بووه‌ته هاوبه‌شی وڵاتان بۆ له‌ناوبردنى تیرۆر و سه‌قامگیرى لایه‌نى ته‌ناهیی له ڕۆژهه‌ڵاتى ناوه‌ڕاست، بۆیه ئه‌وه‌ى پێوه‌سته به هه‌رێمى كوردستان ئه‌وه ده‌گه‌یه‌نێت كورد كاریگه‌ره له ڕووبه‌ڕووبوونه‌وه‌ى تیرۆر.
له درێژه‌ی قسه‌كانیدا وتی، به‌هۆى مه‌سروور بارزانییه‌وه ڕۆڵى كورد به‌رچاو بووه له كۆنگره‌ى میونشن و ئه‌وه‌یش هۆكار بووه بۆ ئه‌وه‌ى له‌لایه‌ن وڵاتانه‌وه گرنگى پێ بدرێ و هه‌وڵ بده‌ن هاوئاهه‌نگى زیاتر دروست بكه‌ن به‌تایبه‌ت له كاركردن بۆ داهاتوو”.
ئه‌و مامۆستایه‌ى زانكۆ دووپاتی ده‌كاته‌وه كه كوردستان ئێسته بووه‌ته ناوه‌ندێك بۆ نه‌هێشتنى توندڕه‌وى و تیرۆر له دنیادا، بۆیه به‌شدارى كورد له‌و كۆنگرانه‌دا گرنگه.
“هه‌موو پێوه‌ندییه دیپلۆماسییه‌كان له‌گه‌ڵ هه‌رێمى كوردستان پێوه‌ندى به متمانه‌یه‌كى نێوده‌وڵه‌تى هه‌یه، به‌تایبه‌تی كه هێزه ته‌ناهییه‌كان ڕۆڵى گه‌وره‌یان بینیوه له ڕابردوودا” خه‌سره‌و وای گوت و دووپاتیشى كرده‌وه “له داهاتوو هه‌ر پلانێك هه‌بێت بۆ دژایه‌تى تیرۆر، ئه‌وه بۆچوونى هه‌رێمى كوردستان وه‌رده‌گیرێ”.
لاى خۆیه‌وه د. كرمانج عوسمان شاره‌زاى نێوده‌وڵه‌تى، بۆ “وشه” ئاماژه‌ى به‌وه كرد، ئێسته ره‌وشى ته‌ناهیی له دنیا بووه‌ته پرسێكى نێوده‌وڵه‌تى و ته‌قینه‌وه‌یه‌ك له پاریس ڕوو بدات، لێره كاردانه‌وه‌ى ده‌بێ، بۆیه به‌شدارى كورد له كۆنگره‌ى ئاسایشى میونشن ته‌نیا ئه‌وه نییه به‌شدارییه‌كى ئاسایى بێت، به‌ڵكو به‌شداریى هه‌رێمێكى به ئه‌زموونه له بوارى رووبه‌ڕووبوونه‌وه‌ى تیرۆر.
دووپاتی كرده‌وه “مه‌سروور بارزانى ئه‌زموونێكى گرنگى هه‌یه له بوارى ته‌ناهیی و ئێسته كه ده‌بێته سه‌رۆك وه‌زیرانى كوردستان، تێكه‌ڵاوییه‌كى زۆر باش دروست ده‌كات و له ئاستى نێوده‌وڵه‌تى كاردانه‌وه‌ى ده‌بێ”.
كرمانج عوسمان ئه‌وه‌یشى گوت، كوردستان وه‌ك ده‌وڵه‌ت له بوارى ڕووبه‌ڕووبوونه‌وه‌ى تیرۆر مامه‌ڵه‌ى له‌گه‌ڵ ده‌كرێ.
ئه‌و شاره‌زایه‌ی سیاسه‌تی نێوده‌وڵه‌تی زیاتر گوتی “به‌شدارى مه‌سروور بارزانى له كۆنگره‌ى ئاسایشى میونشن بۆ داهاتوو كاریگه‌رى گه‌وره‌ى ده‌بێت، به‌تایبه‌تی ئاگادار ده‌بێ له ستراتیجى وڵاتان و ره‌وشى شه‌ڕ و دارایى”.
كوردستان وه‌ك ده‌وڵه‌ت له بوارى ڕووبه‌ڕووبوونه‌وه‌ى تیرۆر مامه‌ڵه‌ى له‌گه‌ڵ ده‌كرێ
