جەبار یاوەر: تەنها لە شەڕی داعش هەزارو حەوتسەد بیست شەهیدمان هەیە

دوای ئەوەی ئەمڕۆ کۆڕبەندی ساڵانەی هەولێر بەڕێوەچوو ئەمینداری گشتی وەزارەتی پیشمەرگە رایگەیاند، لە ساڵی 2003 وە تاوەکو ئێستا لە عێراق زیاتر لە 539 هەزار کەس قوربانی هێرشە تیرۆریستییەکان و کردەوە توندوتیژییەکان بوون و دەشڵێت ”لە شەڕی داعش هەرێمی کوردستان هەزار و 720 شەهید و 10 هەزار و 729 بریندار هەیە”.

جەبار یاوەر، ئەمینداری گشتی وەزارەتی پیشمەرگەی هەرێمی کوردستان لە دوایین پانێڵی رۆژی یەکەمی کۆڕبەندی ساڵانەی هەولێر کە لەژێر ناوی (عێراق و رەوشی ئاسایشی بێچارەسەر) بوو، چەند ئامارێکی خستەڕوو و رایگەیاند: “لە ساڵی 2003 وە تاوەکو ساڵی 2019 زیانە مرۆییەکان لە عێراق بەمشێوەیەیە: 539 هەزار و زیاتر لە 500 قوربانی و شەهید و کوژراو هەن”.

ئەمینداری گشتی وەزارەتی پیشمەرگەی هەرێمی کوردستان دەشڵێت: “زیانەکانی هێزەکانی ئەمریکا لە 2003 وە تاوەکو 2019 بەپێی سەرچاوە ئەمریکییەکان کە بڵاویانکردووەتەوە، چوار هەزار و 384 کوژراو برینداریان هەیە”.

لەبارەی قوربانیانی شەڕی داعش لە هەرێمی کوردستان جەبار یاوەر گوتی: “لە ساڵی 2014 وە تاوەکو 2019 ، هەزار و 750 شەهید و 10 هەزار و 729 بریندار هەن”.