توێژینه‌وه‌یه‌ك: كه‌مخه‌ویی كاریگه‌ری خراپى له‌سه‌ر ره‌فتاری هه‌رزه‌كاران ده‌بێت

به‌پێی توێژینه‌وه‌یه‌كی پزیشكی، ئه‌و هه‌رزه‌كارانه‌ی به‌راورد به‌ كه‌سانی دیكه‌ی هاوته‌مه‌نیان ڕۆژانه‌ چه‌ند سه‌عاتێكی كه‌م ده‌خه‌ون دوور نییه‌ به‌و هۆیه‌وه‌ ڕه‌فتاری‌ هه‌ڵه‌ی وه‌ك (جگه‌ره‌كێشان)‌و (خواردنه‌وه‌ كحولییه‌كان) ڕوو له‌ ژیانیان بكات.

توێژینه‌وه‌كه‌ نه‌خۆشخانه‌ی‌ (بریگهام ئاند ویمه‌ن)‌و كۆلێژی پزیشكی زانكۆی (هارفارد) له‌و یلایه‌تی بۆستنی ئه‌مریكا له‌سه‌ر به‌شێك له‌ قوتابیانی قۆناغی ناوه‌ندیی وڵاته‌كه‌ی ئه‌نجامی داوه‌‌و ده‌ریخستووه‌: له‌ 10 قوتابی، حه‌وتیان ڕۆژانه‌ كه‌متر له‌ هه‌شت سه‌عات ده‌خه‌ون، له‌كاتێكدا ڕۆژانه‌ 8 بۆ 10 سه‌عات خه‌وتن بۆ ته‌ندروستی ده‌روون‌ و جه‌سته‌ی هه‌رزه‌كاران پێویسته‌.

توێژینه‌وه‌كه‌ ئاماژه‌ی بۆ ئه‌وه‌ش كردووه‌ ئه‌و هه‌رزه‌كارانه‌ی ڕۆژانه‌ له‌ شه‌ش سه‌عات كه‌متر ده‌خه‌ون به‌راورد به‌ هاوته‌مه‌نه‌كانیان كه‌ هه‌شت سه‌عات ده‌خه‌ون، زیاتر ئه‌گه‌ری به‌كارهێنانی مادده‌ كحولییه‌كان‌و كێشانی جگه‌ره‌‌و ته‌نانه‌ت مادده‌ هۆشبه‌ره‌كان‌و هه‌ندێكجار خۆكوشتنیش تیایاندا هه‌یه‌.