بە فەرمی زێدان بووەوە راهێنەری یانەی ریال مەدرید
زینەدین زیدان، راهێنەری فەرەنسی دوای 9 مانگ لە بەجێهێشتنی یانەکە بەفەرمی گەڕایەوە یانەی ریال مەدرید و جێگەی سانتیاگۆ سۆلاری دەگرێتەوە.
یانەی ریال مەدرید لەسەر ماڵپەری فەرمی خۆی گەڕاندنەوەی راهێنەرە فەرەنسییەکەی بۆ ریزەکانی راگەیاندووە، دوای ئەوەی وەرزی رابردوو لە دەستی راهێنەرایەتی یانەکە کێشایەوە.
ریال مەدرید بەفەرمی دوورخستنەوەی سانتیاگۆ سۆلاری، راهێنەری تیپی یەکەمی یانەکەی لە پۆستەکەی بە رەزامەندی دەستەی بەڕێوەبەرایەتی ریال مەدرید لادا و داواشیکردووە وەک ئەندامێکی یانەکە بەردەوامبێت.
لەو کۆبوونەوەیەدا کە ئەمشەو لە سانتیاگۆ بێرنابیۆ بەڕێوەچوو، ریال مەدرید بەفەرمی تاوەکو ساڵی 2022 زینەدین زیدان، راهێنەری فەرەنسی وەک راهێنەری نوێی یانەکە دەستنیشانکرد و جارێکی دیکە ئەو راهێنەرە گەڕایەوە یانەکە.
زینەدین زیدانی 46 ساڵ لە ساڵی 2016 بووە راهێنەری یانەی ریال مەدرید، سێ وەرز لەسەریەک نازناوی خولی یانە پاڵەوانەکانی ئەوروپای لەگەڵ یانەکە بردەوە، دوای ئەوەش وازی لە راهێنەرایەتی یانەکە هێنا و تاوەکو ئێستا بێ یانە مابووەوە.
