دەیان پڕۆژەی ڕاگیراو لە دھۆك دەستپێدەكەنەوە
قایمقامی دھۆك مۆژدەی ئەوەی بە ھاووڵاتیانی شارەكە دا، كە پارەی پێویست تەرخان دەكرێت و ھەموو پڕۆژە راگیراوەكان دەست پێدەكەنەوە.
بە ھۆی قەیرانی چوار ساڵی رابردووەوە، كاركردن لە سێ ھەزار پڕۆژە وەستاوە و خەریكە ھەرێمی كوردستان دەكەوێتە سەر پێ بۆ تەواوكردنی پڕۆژە راگیراوەكان. جەھوەر عەلی، قایمقامی قەزای ناوەندیی دھۆك، بە ماڵپەڕی فەرمیی پارتی دیموكراتی كوردستانی راگەیاند: “بڕیارە لەگەڵ دابینكردنی پارەی پێویست، دەست بە تەواوكردنی پڕۆژە راگیراوەكانی ساڵانی رابردوو بكرێتەوە و لەو چوارچێوەیەدا ھەموو ئەو پڕۆژانەی لە شاری دھۆك تەواو نەكراون، كاركردن تێیاندا ئەنجام دەدرێت، كە دەیان پڕۆژەن و بەشێكیان پەیوەستن بە ژیانی رۆژانەی ھاووڵاتیانی شاری دھۆكەوە”.
لەگەڵ باشبوونی رەوشی داراییدا، ماوە ماوە حكوومەت پارە بۆ بەڵێندەران تەرخان دەكات و ئەوانیش دەیانەوێ بەو پارەیە پڕۆژەی نوێ جێبەجێ بكەن، قایمقامی دھۆك ئاشكرای كرد: “لە ماوەكانی رابردوودا كاركردن لە ھەندێ پڕۆژە دەستی پێكردووەتەوه، لەوانەش تەلاری بەڕێوەبەرایەتیی گشتی پلان و نەخشەدانان لە شاری دھۆك كۆتایی ھاتووە، ئێمە چاوەڕێی سەرۆكایەتیی ئەنجوومەنی وەزیران و وەزارەتەكان دەكەین بۆ دابینكردنی پارەی دەستپێكردنەوەی پڕۆژەكان”.
جەھوەر عەلی روونی كردەوە: “لە سەرۆكایەتیی حكوومەت بەڵێن دراوە لەمەودوا پارەی زیاتر بۆ بەڵێندەران خەرج بكرێت، تا بتوانن وەك پێویست دەست بە كارەكانیان بكەنەوە، ھەنگاوەكانی ئەمساڵی حكوومەتیش بۆ ئاوەدانكردنەوەی كوردستان، جێگەی ئومێدن و پێشبینی دەكەین لە داھاتوویەكی نزیكدا ئەو ھەنگاوانە خێرا بكرێن”.
