بارزانی لوغمەكانی داعشمان لەناو برد لوغمى سياسى لەبەردەم پرۆسەی سیاسی كوردستانیش لەناو دەبەین
خواكوڕك
له سه‌ره‌تاى وتاره‌كه‌يدا، سه‌رۆك بارزانى رايگه‌ياند، ئه‌مڕۆ ده‌توانين بڵێين به گشتيى هه‌موو خاكى كوردستان رزگار كرا.
گوتىيشى: ئه‌مڕۆ ده‌بينين نه‌ته‌وه و مه‌زهه‌ب و ئاينى جيا به‌يه‌كه‌وه كۆبوونه‌ته‌وه و ئه‌وه جێى دڵخۆشييه و ئه‌وه ئه‌و وڵاته و كوردستانه‌يه كه پێشمه‌رگه له پێناويدا قوربانى ده‌دات.
هه‌روه‌ها گوتى: له كوردستان مه‌لا بانگ ده‌دات و له كڵێسه‌كانه‌وه زه‌نگ و له په‌رستگه‌ى ئێزدييه‌كانيش سرووتى تايبه‌تى ئاينى پێشكه‌ش ده‌كرێن و ئه‌م تابڵۆيه ده‌بێت به‌و جۆره زياتر بره‌وى پێ بدرێت و بمێنێته‌وه.
روونيشيكرده‌وه، داعش به‌ره‌و شكستێكى مه‌زن ده‌ڕوات.
سه‌رۆك بارزانى گوتيشى: زۆر كه‌س ده‌پرسن بۆچى موسڵ و بۆ ده‌بێت پێشمه‌رگه شه‌ڕى مووسڵ بكات، له وه‌ڵامى ئه‌وانه‌دا ده‌ڵێم تا مووسڵ ئارام نه‌بێت، ئاسايشى هه‌رێمى كوردستان مه‌ترسى له‌سه‌ر ده‌بێت.
هه‌روه‌ها گوتى: بۆ ئێمه زۆر گرنگه چاره‌نووسى مووسڵ چونكه پێش هاتنى داعش 300 هه‌زار كورد له مووسڵ ده‌ژيان.
له درێژه‌ی قسه‌كانیدا سه‌رۆك بارزانى گوتيشى: ئێمه رێككه‌وتنمان له‌گه‌ڵ هاوپه‌يمانان و عێراق هه‌يه و ئه‌و هێڵه‌ى ئێستا هه‌يه و پێشمه‌رگه‌ى تێدايه، ئه‌وه پاشه‌كشێى لێ ناكرێت و ئێمه جارێكى ديكه ناهێڵين ئێوه ئاواره ببنه‌وه و ئه‌و رێككه‌وتنانه‌ى كراوون و ئه‌وه‌شى ده‌كرێت ده‌بێت چاره‌نووسى ئێوه زامن بكات.
ئاماژه‌شى بۆ ئه‌وه كرد، له سه‌ره‌تاى هاتنى داعشدا به‌شێك هاوكارى داعشيان كرد و بوونه چاوساغى، ئێستا ئه‌وانه‌ى به ناوى ئاواره رووده‌كه‌نه ئه‌و شوێنانه‌ى پێشمه‌رگه رزگاريكردوون، ئه‌وا به دڵنياييه‌وه به هيچ شێوه‌يه‌ك رێگه ناده‌ين و ئه‌وانه‌ى بوونه شه‌ريكى تاوانى داعش ده‌بێت باجى ئه‌و تاوانانه بده‌ن.
سه‌رۆك بارزانى جه‌ختى له‌سه‌ر ئه‌وه كرده‌وه، ئه‌وانه‌ى ده‌ستدرێژى و تاوانيان له دژى كچانى ئێمه ئه‌نجامداوه له هه‌ر كوێ بن ده‌بێت باجى ئه‌و تاوانانه بده‌ن و تۆڵه‌يان لێده‌كرێته‌وه.
سه‌رۆكى هه‌رێمى كوردستان روويكرده ئه‌و رێكخراوانه‌ى كورد تۆمه‌تبار ده‌كه‌ن به تۆڵه‌كردنه‌وه، گوتى: ئه‌وان هه‌رچۆن بيرده‌كه‌نه‌وه ئاساييه، به‌ڵام ئه‌وه سياسه‌تى ئێمه‌يه و ئێمه به هيچ شێوه‌يه‌ك رێگه به تاوانباران ناده‌ين به ناوى ئاواره‌وه بگه‌ڕێنه‌وه ئه‌و ناوچانه.
هه‌روه‌ها گوتى: هه‌رێمى كوردستان زياتر له يه‌ك مليۆن و نيو ئاواره‌ى له خۆ گرتووه، ئه‌وه بۆ له‌به‌رچاو ناگرن.
سه‌رۆك بارزانى باسى له‌وه‌شكرد، كاتێك رژێمى به‌عس رووخا وتمان ئيدى رزگار بووين، به‌ڵام ئه‌وه‌نده‌ى نه‌برد، ئه‌نسارولئيسىلام و قاعيده په‌يدا بوون و پاشان كابرايه‌ك له سه‌ر حسابى كورد بووه حاكم له به‌غدا به‌ڵام چاوى له‌وه بوو فڕۆكه‌ى ئێف شازده‌ى بۆ بێت بۆ ئه‌وه‌ى بۆردومانى ئێمه بكات و دواى ئه‌ويش داعش هات، به‌ڵام ئێمه چيديكه رێگه به‌وه ناده‌ين پيلانى دوژمنان سه‌ربگرێت.
ره‌وشى ناوخۆ و كێشه‌كان
سه‌رۆك بارزانى باسى له پرسه ناوخۆييه‌كان كرد و گوتى: هه‌ندێك كه‌س هه‌وڵيان دا كوده‌تا ئه‌نجام بده‌ن، من دوو پرسياريان لێده‌كه‌م، ئايا وه‌زعى پێش كوده‌تان باش بوو يان ئێستا، ئێوه چيتان به‌ده‌ستهێنا و چيتان گۆڕى.. چه‌ندى ديكه‌ش خۆتان ماندوو بكه‌ن هيچتان به‌ده‌ستناكه‌وێت و ئامۆژگاريتان ده‌كه‌م، واز له‌و كوده‌تا و پيلانانه بێنن.
هه‌روه‌ها گوتى: ئه‌گه‌ر ده‌تانه‌وێت فه‌رموون، هه‌ميشه ئێمه له‌گه‌ڵ چاره‌سه‌رى ئاشتيانه‌داين، ئه‌گه‌ر هه‌ر سوورن له‌سه‌ر كوده‌تا، عيلاجى كوده‌تا زۆره و به هيچ جۆرێك زۆرى هيچ كه‌سێك قبوڵ ناكه‌ين.
چاوه‌ڕوانى كه‌س ناكه‌ين
سه‌رۆك بارزانى روويكرده ئه‌و لايه‌نانه‌ى له خه‌می گه‌لدان و گوتى: ئێوه له‌گه‌ڵ ئه‌وانه مه‌بن كه هيچ خه‌مى ميله‌تيان نييه، فه‌رموون ئێوه كۆببنه‌وه و بڕيار بده‌ن، ئه‌گه‌ر نا كات ده‌ڕوات و ئێمه‌ش چاوه‌ڕوانى كه‌س ناكه‌ين.
سه‌رۆك بارزانى باسى له‌وه‌شكرد، هه‌ندێك پێشبينى ئه‌وه‌يان ده‌كرد، شه‌ڕى ناوخۆ درووست بێت، به‌ڵام خۆشبه‌ختانه ئه‌وه رووى نه‌دا و بينيمان پێشمه‌رگه و رۆڵه‌ى پارچه‌كانى ديكه‌ى كوردستانيش به‌يه‌كه‌وه خوێنيان رشت و ئه‌وه‌ش گه‌وره‌ترين ده‌ستكه‌وت و سه‌روه‌رييه بۆ كوردستان.
كوا سه‌ربه‌خۆبوون و راپرسى..
سه‌رۆك بارزانى گوتى: هه‌ندێك ده‌ڵێن كوا سه‌ربه‌خۆبوون و راپرسيى، لێره‌وه ده‌ڵێم سه‌ربه‌خۆيى مافى ره‌واى كورده، به‌ڵام ئه‌وه پرۆسه‌يه‌كه و پێويستى به وتوێژ و گفتوگۆ هه‌يه و له سه‌ردانى ئه‌م دواييه‌شدا بۆ به‌غدا ئه‌وه‌مان باسكرد و خۆشبه‌ختانه وه‌ڵامى ئه‌رێنى هه‌بوو، ئه‌وه‌ش جێگه‌ى دڵخۆشييه، ئه‌وه پرۆسه‌يه‌كه ئێمه ده‌ستى لێ هه‌ڵناگرين و ئه‌گه‌ر له‌گه‌ڵ به‌غدا گه‌يشتينه رێككه‌وتن ئه‌وه ئيعتبارى زياتر ده‌بێت و پێويست به ريفراندۆم ناكات، به‌ڵام ئه‌گه‌ر زانيمان ناگه‌ينه رێككه‌وتن ئه‌وا ئێمه راپرسى خۆمان ده‌كه‌ين.
لوغمى سياسى
هه‌روه‌ها گوتى: وه‌ك چۆن پێشمه‌رگه توانيى سه‌رجه‌م ئه‌و لوغمانه‌ى داعش هه‌ڵگرێته‌وه، كه داعش له‌سه‌ر رێگه و خاكى كوردستان چاندبوونى، به دڵنياييه‌وه ده‌ڵێم ده‌توانين هه‌موو ئه‌و لوغمه سياسييانه هه‌ڵبگرينه‌وه كه له‌سه‌ر رێگه‌مان ده‌يچێنن. ئينجا بۆ خۆتان جوێن ده‌ده‌ن، هه‌ڵده‌په‌ڕن و شت ده‌نووسن كه‌يفى خۆتانه ئێمه له‌سه‌ر رێگه‌ى خۆمان سوورين.
فيدراڵيه‌تى پارێزگاكان
سه‌باره‌ت به پرسى فيدراڵييه‌تى پارێزگاكان، سه‌رۆك بارزانى گوتى: هه‌ندێك ئێستا باس له فيدراڵييه‌تى پارێزگاكان ده‌كه‌ن، من ئه‌و شه‌ڕه‌م له‌گه‌ڵ برێمه‌ر كرد، زياتر له 11 هه‌زار عه‌زيز و پێشمه‌رگه‌ى ئێمه شه‌هيد و بريندار بوون، تازه دێن ده‌تانه‌وێت باسى فيدراڵييه‌تى پارێزگاكان بكه‌ن.
له كۆتايى وتاره‌كه‌شيدا سه‌رۆك بارزانى سووپاس و ستايشى پێشمه‌رگه‌ى كرد.
سه‌باره‌ت به شه‌هيدانيش گوتى: نازانين چ بڵێين له ئاستى شه‌هيداندا، به‌ڵام ئه‌وه‌نده ده‌ڵێم كه ئه‌وان سه‌ربه‌رزن و بوونه پارێزه‌رى كوردستان.
له باره‌ى هۆكارى وتاره‌كه‌ى له باشيك، سه‌رۆك بارزانى گوتى: له‌به‌ر ئه‌وه‌ى هه‌موو دين و مه‌زهه‌ب و نه‌ته‌وه‌كان له باشيكن پێمان باش بوو، لێره ئه‌م وتاره پێشكه‌ش بكه‌ين.
س: ك24
