٦٨ په‌رله‌مانتار داوای كاراكردنه‌وه‌ی سه‌رۆكایه‌تی هه‌رێم ده‌كه‌ن
68 په‌رله‌مانتار له فراكسیۆنه جیاجیاكانی په‌رله‌مانی كوردستان، داوای هه‌مواركردنه‌وه‌ی یاسای سه‌رۆكایه‌تی هه‌رێمی كوردستان ده‌كه‌ن و بۆ ئه‌و مه‌به‌سته پێشنیازی كاراكردنه‌وه‌ی سه‌رۆكایه‌تی هه‌رێمی كوردستان و هه‌مواری شێوازی هه‌ڵبژاردنی سه‌رۆك تا په‌سەندكردنی ده‌ستوور ده‌كه‌ن.
ئه‌و 68 په‌رله‌مانتاره پێشنیازی پڕۆژه یاسایه‌كیان خستووه‌ته به‌رده‌ستی سه‌رۆكایه‌تی په‌رله‌مانی كوردستان، بۆ ئه‌وه‌ی سه‌رۆكایه‌تی هه‌رێمی كوردستان كارا بكرێته‌وه و شێوازی هه‌ڵبژاردنی سه‌رۆكی هه‌رێمی كوردستان تا په‌سه‌ندكردنی ده‌ستوور هه‌موار بكرێته‌وه و بخرێته به‌رنامه‌ی كاری په‌رله‌مانی كوردستانه‌وه، بۆ ئه‌وه‌ی گفتوگۆی له‌سه‌ر بكرێت و په‌سه‌ند بكرێت.
ئومێد خۆشناو، سه‌رۆكی فراكسیۆنی پارتی له كۆنفرانسێكی رۆژنامه‌وانیدا گووتی: “وه‌ك فراكسیۆنی پارتی له‌گه‌ڵ فراكسیۆنه‌كانی دیكه‌دا پێشنیازی كاراكردنه‌وه‌ی سه‌رۆكایه‌تی هه‌رێمی كوردستان كراوه و 68 په‌رله‌مانتار واژۆیان له‌سه‌ر كردووه”.
لە بارەی هەماهەنگی نەکردنی فراکسیۆنی یەکێتی نیشتیمانی کوردستان بۆ یەکلا کردنەوەی پرسی کاراکردنەوەی سەرۆکایەتی هەرێم، ئومێد خۆشناو رایگەیاند: “داوام لە فراکسیۆنی یەکێتی کردووە، بەڵام ئەوان نەهاتوونەتە پێش و چاوەڕێی بڕیاری سیاسی پارتەکەیان دەکەن، بەڵام ئێمە دەستمان بە کارەکانمان کردووە”.
لە بارەی بەشداری نەکردنی یەکێتی لە کابینەی داهاتووی حکوومەتی هەرێمی کوردستان، سەرۆکی فراکسیۆنی پارتی رایگەیاند: “هیوا ناخوازین وابێت، بەڵام ئەگەر یەکێتی نەیەتە پێش، دەستمان کراوە دەبێت”.
