وەزارەتی سامانە سروشتیەكان بڕی یەك ملیار و 5 سەد ملیۆن دینار داوا قەرەبوو لە ئێن ئارتی دەكات
خواكوڕك
لە دوای ئەوەی كەناڵی NRTزنجیرەك راپۆرتی لەسەر داهاتی نەوتوو خەرجیەكانی وەزارەتی سامانە سروشتیەكان پەخش كردو ئەو ژمارانەی كە وەزارەتی سامانە سروشتیەكان مانگانەی لە رێگای راپۆرتی فرۆشی نەوت بڵاوی دەكاتەوە بە ناراست زانی, لە وەڵامی زنجیرە راپۆرتەكانی NRTئەمڕۆ وەزارەتی سامانە سروشتیەكان راگەیێندراوێكی بڵاو كردەوە.
وەزارەتی سامانە سروشتیەكانی هەرێمی كوردستان ئەمڕۆ لە راگەیێندراوێكیدا كە لە ماڵپەری فەرمی وەزارەت بڵاویكردۆتەوە رایگەیاند” دوای ئەوەی هۆشدارییەكی یاسایی لە رۆژی 10ی تشرینی دووەم/ نۆڤەمبەر، ئاراستەی كەناڵیNRTكرد, ئەمڕۆ سكاڵای یاسایی لەسەر ئەو كەناڵە تۆماركردووە و بە بڕی یەك ملیار و 5 سەد ملیۆن دینار داوای قەرەبووكردنەوە دەكات.
بە گوێرەی راگەیەندراوی وەزارەتی سامانە سرووشتییەكان، پێشتر داوایان لەو كەناڵەكردووە، داوای لێبوردن لە وەزارەتەكەیان و حكوومەت بكات و مۆڵەتی 3 رۆژیشیان پێیداوە بۆ ئەوەی ژمارە و داتاكان راستبكاتەوە, ئەگەر لە ماوەی ئەو سێ رۆژەدا، ژمارەكان راستنەكەنەوە، كە بە ئەنقەست” داتا و ژمارەی لە بارەی بەرهەمهێنانی نەوت بڵاوكردووەتەوەو زیانی بە وەزارەتەكە گەیاندووە ئەوا رێكاری یاسایی توندی دیكە دەگرنەبەر.
وەك لە روونكردنەوەكەدا ئاماژەی بۆ كراوە، وەزارەتی سامانە سروشتیەكان، رۆژی 16/11/2016، داوای یاسایی لەسەر كەناڵەكە تۆماركردووە و بە بڕی یەك ملیار و پێنج سەد ملیۆن دینار، داوای قەربووكردنەوەی كردووە.
