محه‌مه‌د حه‌لبوسی: بوونی هێزه‌كانی ئه‌مریكا گه‌ره‌نتییه بۆ پاراستنی عێراق
سه‌رۆكی په‌رله‌مانی عێراق رایده‌گه‌ێنێ، بوونی ئه‌مریكا گه‌ره‌نتییه بۆ پاراستنی عێراق له تیرۆریستان و پێشنیاری هه‌ندێك فراكسیۆنی په‌رله‌مانی بۆ چوونه ده‌ره‌وه‌ی هێزه‌كانی ئه‌و وڵاته كۆتایی پێ هاتووه.
محه‌مه‌د حه‌لبوسی، سه‌رۆكی ئه‌نجومه‌نی نوێنه‌رانی عێراق له دیدارێكیدا له باڵیۆزخانه‌ی عێراق له واشنتن رایگه‌یاند: له نێوان هه‌رسێ سه‌رۆكایه‌تیییه‌كه‌ی عێراق و حیزبه‌كان كۆده‌نگییه‌ك له‌سه‌ر مانه‌وه‌ی هێزه‌كانی ئه‌مریكا له عێراقدا هه‌یه.
هه‌روه‌ها گوتی: داوای كشانه‌وه‌ی هێزه‌كانی هاوپه‌یمان به‌سه‌رۆكایه‌تی ئه‌مریكا له عێراق له‌م قوناغه‌دا له‌به‌رژه‌وه‌ندی تیرۆریستانه.
شایانی باسه ماوه‌ی چه‌ند رۆژێكه حه‌لبوسی به‌سه‌ردانێك له ئه‌مریكایه‌و چه‌ندین دیدارو كۆبوونه‌وه‌ی له‌گه‌ڵ به‌رپرسانی ئه‌و وڵاته ئه‌نجام داوه.
