نێچیرڤان بارزانی لەگەڵ شاندێكی پەیمانگای ئەمریكی بۆ ئاشتی كۆبویەوە
![](https://xwakurk.com/wp-content/uploads/2019/03/1-81.jpg)
دوای ئەوەی شاندێكی پەیمانگای ئەمریكی بۆ ئاشتی سەردانی هەرێمی كوردستانی كرد, لە لایەن نێچیرڤان بارزانی سەرۆك وەزیرانی حكومەتی هەرێمی كوردستان پێشوازی لێكران و لە میانەی گفتوگۆكانیاندا سەرۆكی جكومەت رایگەیاندووە,هەموو هەوڵێك بۆ دروستكردنەوەی متمانە و دیالۆگ لەنێوان پێكهاتە جیاجیاكان بەمەبەستی گەڕاندنەوەیان و پێشكەشكردنی خزمەتگوزاری دەدات.
ماڵپەری فەرمی حكوومەتی هەرێمی كوردستان بڵاویكردەوە ئەمڕۆ یەكشەممە(٣١-٣-٢٠١٩)نێچیرڤان بارزانی سەرۆك وەزیرانی هەرێمی كوردستان، پێشوازی لە خاتوو نانسی لینبۆرگ سەرۆكی پەیمانگای ئەمەریكی بۆ ئاشتی و شاندێكی یاوەری كرد.
لە دیدارێكدا شاندی میوان خۆشحاڵیی خۆیان بە سەردانی هەرێمی كوردستان دەربڕی و سوپاسی هاوكاریەكانی حكوومەتی هەرێمیان كرد بۆ كار و چالاكییەكانی نووسینگەكانیان و پێشوازیكردن لە ژمارەیەكی زۆری ئاوارە و پەنابەرانی شەڕی داعش.
شاندەكە جەختیان لەوە كردەوە كە لەگەڵ حكوومەتی هەرێم هاوكار دەبن بۆ دروستكردنەوەی متمانە لەو ناوچانەی ئاوارەكان لێی هاتوون و نیگەرانییان بۆ نەگەڕانەوەیان بەهۆی نەبوونی ئاسایش و خزمەتگوزارییەوە لە ناوچەكانیان دەربڕی و لەمباریەوە دیالۆگێكی جددییان لەنێوان دەزگاكانی حكوومەت و خەڵكی ناوچەكەدا به پێویست زانی.
لای خۆیەوە سەرۆك وەزیرانی هەرێمی كوردستان سوپاسی ئەو سەردانەی كرد و دڵنیای كردنەوە كە حكوومەتی هەرێم هەموو هەوڵێك بۆ دروستكردنەوەی متمانە و دیالۆگ لەنێوان پێكهاتە جیاجیاكان بەمەبەستی گەڕاندنەوەیان و پێشكەشكردنی خزمەتگوزاری دەدات.
سەرۆكوەزیران پوختەیەكیشی دەربارەی پرۆسەی سیاسی لە عێراق و هەوڵەكان بۆ دروستكردنی پەیوەندییەكی باش لەنێوان حكوومەتی عێراق و هەرێمی كوردستاندا پێشكەش كرد كە بەهۆیەوە چەند كێشەیەك چارەسەر كراون و لە داهاتووشدا لەسەر كێشەكانی دیكە گفتوگۆ دەكرێت، هەروەها ئاماژەی بە هەوڵەكانی پێكهێنانی كابینەی نوێی حكوومەتی هەرێمی كوردستان كرد و دووپاتی كردەوە كە هەوڵێكی جددی لەنێوان لایەنەكاندا هەیە بەمەبەستی پێكهێنانی كابینەی نوێ لە داهاتوویەكی نزیكدا.
تاوتوێكردنی دۆخی ناوچەكە و دوا پێشهاتە سیاسییەكان و دۆخی ئاوارە و پەنابەران لە هەرێمی كوردستان، لایەنێكی دیكەی دیدارەكە بوو.