توركیا: ناتانیاهۆ دەیەوێت ئاگر لە رۆژهەڵاتی ناوەڕاست بەربدات
دوای ئەوەی ناتانیاهۆ سەرۆك وەزیرانی ئیسرائیل لە سەروبەندی هەڵبژاردنی پەرلەمانی وڵاتەكەی لە گوتارێكیدا داوای كردبوو بەشێك لە كەناراوەكانی رۆئژاوا بە ئیسرائیلەوە بلكێندرێت, پارتی داد و گەشە پێدانی توركیا دەلێت ناتانیاهۆ بەو لێدوانانەی گر لە جیهان و رۆژهەڵاتی ناوەڕاست بەردەدات.
عومەر چەلیك، گوتەبێژی پارتی داد و گەشەپێدانی توركیا بە ئاژانسی ئەنادۆڵوی فەرمی وڵاتەكەی گوتووە: “لێدوانە پڕ هەڵچوون و سەركێشەكانی نەتانیاهو، نەك تەنها رۆژهەڵاتی ناوەڕاست، بەڵكو گڕ لە جیهان بەردەدات و ئەو قسانەشی كە لەبارەی پەیوەستكردنی بەشێكی كەناراوی رۆژئاوا بە ئیسرائیلەوە دەیكات، بۆ ئەوەیە لە هەڵبژاردندا پاڵپشتیی راستڕەوە توندڕەوەكان بە دەستبهێنێ”.
هەروەها گوتوویەتی: “لێدوانەكانی سەرۆك وەزیرانی ئیسرائیل، گرژی زیاتر و ململانێی گەورەتر لە جیهاندا دەخوڵقێنێ، نەتانیاهو بەو قسانەشی جارێكی دیكە رووی شەڕانگێزیی خۆی ئاشكرا كردووەتەوە”.
شایەنی بیرخستنەوەیە, ئەو قسانەی پارتەكەی ئەردۆغان لە وەڵامی لێدوانێكی ئەم دواییەی سەرۆك وەزیرانی ئیسرائیلە كە رایگەیاندبوو: “ئەگەر لە هەڵبژاردنی رۆژی 9/4/2019 سەركەوتن بەدەستبهێنێ، دەست بە گرتنەبەری رێوشوێنی پێویست دەكات بۆ ئەوەی چەند بەشێكی كەناراوی رۆژئاوا بە ئیسرائیلەوە پەیوەست بكات”.
