یەکێتی هۆکاری واژۆنەکردنی ڕێککەوتنامەکەی لەگەڵ پارتی ئاشکرا دەکات.. کێ بەهۆکار دەزانێت؟
![](https://xwakurk.com/wp-content/uploads/2019/04/پارتی-و-یهكێتی.jpg)
بەرپرسێکی یەکێتیی نیشتمانیی کوردستان، بزووتنەوەی گۆڕان بە هۆکاری واژۆنەکردنی ڕێککەوتنەکەیان لەگەڵ پارتی دیموکراتی کوردستان دەزانێت.
ئەحمەد قەدەفەری، جێگری لێپرسراوی مەڵبەندی شارەزووری یەکێتی ڕایگەیاند، واژۆ نەکردنی ڕێککەوتنی پارتی و یەکێتی ”پەیوەندی بە یەکێتییەوە نییە“ و بانگەشەی ئەوەی کرد کە بابەتەکە پەیوەندی بە گۆڕان و پارتییەوە هەیە. ڕوونیشی کردەوە: ”ئێمە داوای دوو جێگرمان بۆ پۆستی سەرۆکی ھەرێمی کوردستان کردووە، بەڵام گۆڕان ڕەتی کردووەتەوە کە پۆستی سەرۆکی ھەرێم دوو جێگری ھەبێت، بێگومان ئەوەش کێشەکەیە و ئێمە چاوەڕێی چارەسەرکردنی دەکەین“.
بە گوتەی بەرپرسەکەی یەکێتی: ”ھۆکاری سەرەکیی واژۆ نەکردنی ڕێککەوتنی یەکێتی و پارتی بۆ بزووتنەوەی گۆڕان دەگەڕێتەوە و ئەگەر گۆڕان بەشداری لە حکوومەت نەکردایە، ئێستا یەکێتی و پارتی بۆ بێکھێنانی کابینەی نوێی حکوومەتی ھەرێمی کوردستان دەگەشتنە دەرنجامێک“.
ئەحمەد قەدەفەری دووپاتی کردەوە: ڕێککەوتنی حزبەکەی لەگەڵ پارتی هەڵنەوەشاوەتەوە، بەڵکوو هەر کاتێک کێشەی پۆستی جێگری دووەمی سەرۆکی هەرێمی کوردستان چارەسەر کرا، ئەوکاتە ڕێککەوتنەکەیان لەگەڵ پارتی واژۆ دەکەن.