نێچیرڤان بارزانی : نابێت قوربانیانی ئه‌نفال و كه‌سوكاریان له‌بیر بكه‌ین
سه‌رۆك وه‌زیرانی هه‌رێمی كوردستان رایده‌گه‌ێنێ،ئێمه وه‌ك میلله‌تێك ده‌بێت به ئه‌ركی خۆمان بزانین كه نه‌ك ته‌نها یادی قوربانیانی ئه‌نفالكراو بكه‌ینه‌وه، به‌ڵكو هاوكاریی ته‌واوی كه‌سوكاریان و ئاوه‌دانكردنه‌وه‌ی زێد و باشتركردنی هه‌‌لومه‌رجی ژیانیشیان، له ئه‌ستۆی ئێمه‌دایه.
نێچیرڤان بارزانی ، سه‌رۆك وه‌زیرانی هه‌رێمی كوردستان له یادی ئه‌نفالدا په‌یامێكی بڵاوكرده‌وه، ئه‌مه ده‌قه‌كه‌یه‌تی:
وا جارێكی تر دوای زیاتر له (۳۰) ساڵ یادی قوربانیان و كه‌سوكاری شاڵاوی دڕنده‌ی ئه‌نفال ده‌كه‌ینه‌وه. ئه‌و شاڵاوه‌ی هیچ سنوورێكی نه‌ده‌ناسی، ئافره‌ت، پیاو، منداڵ و به‌ساڵاچوو، گرنگ له‌ناوبردنی ژیان بوو له گوند و شارۆچكه و شاره‌كانی ئه‌م به‌شه‌ی كوردستان.
سیاسه‌تی ڕه‌گه‌زپه‌رستانه‌ی ڕژێمی به‌عس به‌رامبه‌ر میلله‌‌ته‌كه‌مان جگه له وێرانكاری و تۆقاندن و سه‌پاندنی ده‌سه‌ڵاتی دێوه‌زمه‌ی ده‌وڵه‌تی عێراق، ژیانی زیاتر له (١٨٠) هه‌زار كه‌سی به چه‌كی قورس و گازی كوشنده و كیمیابارانی ئاسمانیی كوردستان، به‌كۆتا هێنا.
ئێمه وه‌ك میلله‌تێك ده‌بێت به ئه‌ركی خۆمان بزانین كه نه‌ك ته‌نها یادی قوربانیانی ئه‌نفالكراو بكه‌ینه‌وه، به‌ڵكو هاوكاریی ته‌واوی كه‌سوكاریان و ئاوه‌دانكردنه‌وه‌ی زێد و باشتركردنی هه‌‌لومه‌رجی ژیانیشیان، له ئه‌ستۆی ئێمه‌دایه.
سه‌رباری هه‌موو ئاڵۆزی و سه‌ختییه‌كی سیاسیی وڵات، ساڕێژكردنی برینی ئه‌نفال و قه‌ره‌بووكردنه‌ویان، ده‌بێت كاری سه‌ره‌كیی ده‌وڵه‌ت و حكوومه‌تی عێراق بێت، ئه‌مه به‌رپرسییه‌كی ئه‌خلاقی و مێژووییه.
بۆ ڕێگری له هه‌ر هێرشێكی هاوشێوه‌ی ئه‌نفال له داهاتوودا دژی گه‌له‌كه‌مان جا له‌ژێر دروشمی نه‌ژادپه‌رستی، نه‌ته‌وایه‌تی، ئایینی یان ئایدیۆلۆژیی سیاسیدا بێت، ئێمه نابێت قوربانیانی ئه‌نفال و كه‌سوكاریان له‌بیر بكه‌ین. با ئه‌مڕۆ، سبه‌ینێ و هه‌موو ڕۆژێك یادیان بكه‌ینه‌وه.
نێچیرڤان بارزانی
14/4/2019
سه‌رچاوه/ ماڵپه‌ری حكومه‌ت
