دواین زانیاری سەبارەت بە رێكەوتنی لایەنەكان بۆ پێكھێنانی حكومەت
گفتووگۆ ناڕاستەوخۆكان بۆ گەیشتن بە رێكەوتن لەسەر پێكھێنانی حكومەتی نوێ بەردەوامن و ئەندامێکی پەرلەمانی کوردستان لە فراکسیۆنی پارتی دیموکراتی کوردستان ئاشکرای کرد کە داوا کراوە سەرۆکی هەرێمی کوردستان دوو جێگری هەبێت و یەکەمیان بە یەکێتی بدرێت، بەڵام پارتی ئەو داوایەی ڕەت کردووەتەوە. پەرلەمانتارێکی گۆڕانیش مەرجی وازهێنانیانی لە پۆستی جێگری سەرۆکی هەرێم ئاشکرا کرد.
ھێڤیدار ئەحمەد، ئەندامی پەرلەمانی کوردستان لە فراکسیۆنی پارتی ڕایگەیاند: ”بڕیاربوو شاندێکی پارتی سەردانی بزووتنەوەی گۆڕان بکات لە سلێمانی، بەڵام وا بە باش زانرا کە جارێ نەڕۆن، بۆ ئەوەی یەکێک لەو بژاردانەی ھەیە، پەسەند بکرێت، تا نزیکبوونەوەی باشتر ھەبێت، لەلایەکی دیکەش بۆ ئەوەی کۆبوونەوەکە بێ ئەنجام نەبێت“.
ئاشکرای کرد، یەکێتی داوای کردووە، لە بەرامبەر جێگری سەرۆکی ھەرێم و وەزارەتی پێشمەرگە، وەزارەتی دارایی پێ بدرێت، بەڵام گۆڕان ئەوەی ڕەت کردووەتەوە. هەروەها ”بژاردەیەکی دیکە ئەوە بووە کە جێگری یەکەم و دووەم ھەبێت و یەکەم بە یەکێتی بدرێت، بەڵام پارتی ڕەتی کردووەتەوە و ڕای گەیاندووە ھیچ ناوێک بۆ ئەوە نییە کە یەکەم و دووەم ھەبێت“.
هێڤیدار ئەحمەد باسی لەوە کرد کە وەزارەتەکان لەنێوان پارتی، یەکێتی و گۆڕاندا یەکلا بوونەتەوە، هەروەها وەزیرێک بۆ پێکهاتەی مەسیحی و وەزیرێکیش بۆ سۆسیالیست دەبێت، بەڵام ”ئەوەی سۆسیالیست لەسەر گفتوگۆکان ماوە“. گوتیشی ”ھەر کە بابەتی دوو جێگر و یاسای سەرۆکایەتیی ھەرێم تەواو بوو، ئەوا ڕاستەوخۆ دوای ئەوە، حکوومەت پێکدێت، ئەگەر ھاتوو یەکێتی دیسان لەسەر ناوەکان بۆ وەزیرەکان پرۆسەکە دوانەخات“.
هەر لەبارەی پرسی سەرۆکایەتیی هەرێم، ڕزگار محەمەد، ئەندامی فراکسیۆنی گۆڕان لە پەرلەمانی کوردستان ڕایگەیاند: ”یەکێتی داوای کردووە یەکێک لە بەرکەوتەکانیان بە گۆڕان بدەن، بۆ ئەوەی جێگری دووەم بۆ سەرۆکی ھەرێم زیاد بکرێت، بەڵام ئێمە پێمان ڕاگەیاندن کە جێگری دووەم بارگرانییە“. ئەوەشی نەشاردەوە کە ”ئەگەر وەزارەتی پێشمەرگە بە گۆڕان بدرێت، ئێمە واز لە پۆستی جێگری سەرۆکی هەرێمی کوردستان دەهێنین بۆ یەکێتی“.
